طبعا مع أنشار مليون قناة لاذاعة الاغانى المصوره بطريقة الفيديو كليب لازم الواحد قبل ما ينزل الكليه الصبح وهو بيضرب
كوباية الشاى باللبن أو النسكافيه أحيانا حسب التساهيل يقلب بردو ف التليفزيون شويه ويشوف أيه النظام وأنا كتير اوى بتوقف أودام قنوات
الآغانى أهو الواحد يهيس شويه قبل ما يشوف وشوش الدكاتره والكتب ويصاب بالاكتئاب
المهم أثناء رحلاتى بين القنوات ديما لازم الاقى معظم الكليبات فيها مغنيين طالعين يستحموا
اه والله اكيد بتشفوها كأنهم معندهمش وقت ياخدوا الشور بتاعهم غير وهما بيصورها الكليب
وممكن تلاقى ف الكليب بانيو محطوط وسط صحرا والمغنى بردو بياخد الشور بتاعه
أو تلاقى البنات اللى بيرقصوا ورا بيدقلوا على نفسهم ميه
من الحر تقريبا
حتى الاعلانات بقت بردو فيها ثقافة الاستحمام
ومتفهمش أيه علاقة هذه الثقافه المتطوره طبعا بموضوع الاغنيه أو كلماتها أو اللحن أو اى بتنجان
يعنى مثلا لو الاغنيه بتقول الطشت قالى الطشت قالى
كنا قولنا ماشى الاستحمام نسبة الى الطشت
لو اغنية الميه تروى العطشان كنا قولنا البنات اللى بيرقصوا بيدلقوا على نفسهم ميه عشان العطش والحر والخنقه زى ما انتوا عارفين
حتى الان لا أحد يعرف من أين نبعت تلك الثقافه اللى كلها نضافه وألقت بظلالها على الكليبات
فى أنتظار اخر التطورات وسنوافيكم بأهم الانباء
شكرا لكم
22 comments:
الثقافه دي ليها فتره من أيام كاظم الساهر في كل عام وانتي حبيبتي ومن ساعتها لاحظت ان كله بقى تحت المطر او الشلال وكله بياخد الشاور بتاعه حتى في البانيو في الصحراء على رأيك والله
هههههههههه من قلبي
والله عندك حق انا حكاية الميه في الكليبات دي بتستفزني جداا خاصة من أول كليب عيش من السلم والثعبان
وشريف مكاوي في إزاي حبيتني من ساعتها والمنتجين مابيستغنوش عن الميه في الكليبات
علي اساس انه بيدي احساس بغسل الهموم وكده وبيشد الجمهور
مع اني مش لاقي اي علاقة بالاستحمام والحب او الخيانة
والغريب ان بعد ما تشوفي كليب من النوع ده تلاقي وراه اعلان عن توفير مياه الشرب وعدم الانفاق في استخدمها
بتاع عم محمد اللي بيوفر ميه عشان يدخل ابنه المدرسه
يعني تناقض رهييييب
ربنا يهديهم
وعلي اسم مصر
تحياتي
موضوعك شيق وممتع حقا واجبرني علي المناقشة والتعليق
حمد الله عالسلامة
ashraf
رجعت تاني
بمناسبة أهم الأنباء
يا ريت المرة الجاية تذيعوا موضوع 0900050 ect
عشان انتشر اوي في معظم القنوات واستفزني
جدااا
في انتظار المزيد
يا بنتى مش الحكومه قالت ثقافه دخول التواليت وقبلها ثقافه الوقوف فى البلكونه بسبب المحله ولسه هنشوف ايه الجديد علينا اصبرى بس
وبعدين هما بيوفروا المصيف هههه
rehab mostafa
دى الحكايه بقت مرض وانتشر بقا
يلا ربنا يشفيهم
roufi
أهو عم محمد بتاع توفير الميه دى مجننى
بص الموضوع بقا كله تناقضات كل حاجه فيها تناقضات ف البلد دى
أنا بدأت أحس أن أنا نفسى متناقضه
roufi
ايه موضوع 0900050 ده
هشوف وهتكلم فيه طبعا
appy
وايه علاقة الحكومه المره دى بثقافة الاستحمام والشاور
عايزين يزحلقونا؟
اللي هو اتصل علي 09000500 مش عارف ايه تكسب جايزة واللي مضايقني ان مصر ماكنش فيها كده
مجرد تقليد غربي غبي هدفه النصب لا غيييييير
roufi
اه والمفتش كرمبو وجيم تيم والهبل ده
يابنى الناس دماغها اتلحست خلاص
انا عايزه ايه موضوع الفرنساوى معاك انا بكرهه
مشيها انجلش او عربى احسن
هههههههههههههههههه
عالصبح كده اقرا موضوعك وانا باهيأ نفسي وداخل استحمى
يعني معنى كده اني جوايا مطرب وانا مش واخد بالي
انا بافكر انزل للبواب واخليه يجيب خرطوم الميه ويرشني بيه
ويا عالم .. يمكن الاقي كام موديل راحو جايين ويستحمو معايا .. ويبقى شارعنا حمام عمومي
بس هل تعتقدي الاغنيه اللي هغنيها وانا باستحمى .. هتضرب ؟؟؟
ياخوفي الميه تقطع والاغنية تفشل والالبون يسقط
ملحوظه
البلوج بتاعك ليه شوقه والله يابنتي
سلاموووووووووووووووز
sooooo
اه ممكن وانت بتغنى تلاقى البنات تلموا عليك ومتخفش انا هاجى ارشك واجيب معايا بقيت البلوجريه
ما احنا لازم نساندك ونقف جمبك ونشجع المطرب اللى جواك
ملحوظه رفيعه
لو كان لبلوجى شوقه كنت جيت بصيت عليه
لا تنسى أن حكومتنا عاوزة نظافة
خصوصا انها حكومة نظيف
فالاستحمام و الطشوط فى الكليبات
بتوجيه رسمى من الحكومة
و ربنا يكفينا شر النظافة اللى من النوع ده
د.حماس
dr.hamas
تفتكر ان الحكومه ليها يد ف الموضوع
والله مش بعيد كل شىء ف البلد دى بقا جايز
اغلب الكليبات لا تستحق المشاهدة ولا التعليق
وخسارة فيها الكلام
كلام على بلاطه
متهيالى عندك حق
يا ستى اهى نضافه برضه
حد يزعل من النضافه؟؟؟؟
السلام عليكم
اولا الماية مرتبطة اكتر بالصيف والرومانسية بعيدا عن المايوهااات او اشباة الهدوم بس اللى لفتت نظرى اكتر كليب بتاع واحد على روتانا اللى بيغنى نفسى احبك نفسى ماتقوليش كفايا حاجة كدة المهم دة تقريبا بيعمل اعلان عن سيراميك الحمام والبانيو ....
وربنا يوفقك وميرسية على زيارتك يا قمر
بأه شيء مستفز و رخم أووووي
بجد الواحد نفسه يشوف كليب محترم
المهم شدي حيلك في المذاكرة
بالتوفيق إن شاء الله
:)
blue-wave
لاء محدش يزعل من النضافه
كلمة حق
لاء مدام بيعمل أعلان يبقا فيها فلوس
نسيب الناس تسترزق
والقادم ... أجمل
أنا مزعلنى أنهم هيخلصوا الميه
Post a Comment