الكحكه فى أيد البنات عجبه

عايزه أتكلم عن حاجه كتير منكم هيشوف أنها مش مهمه خالص

يمكن هى فعلا كده

فى ليله من ذات الليالى وأنا قعده اوادم التليفزيون وبتفرج على برنامج شبابيك لبتاع البت سلملى والبت هبه وأبو دم تقيل الواد اياد

اذ ايه بقى الاقيهم بيتكلموا عن كافيهات البنات

وبيسألوا أيه رأيك فى كافيهات البنات (يعنى كافيه للبنات وبس )؟

وجابوا كافيه تديره ست محجبه وكل اللى أتكلموا تقريب محجبات ومعجبين بالفكره جدا ومستمتعين بوقتهم

مع ان الكافيه بيقدم مشروبات وحاجات عاديه خالص

يعنى مش شيشه ولا حاجات وحشه من دى

الاقيلك بقى ياختى الولاد بيتصلوا واللى يقولك الاختلاط موجود فى اى حته وهى جت على الكافيه

واللى يقول ما يقعدوا فى البيت أحسن

واللى يقول كذا وكذا

طيب وليه يعنى كده

أنا شخصيا مع الفكره جدا وعجبتنى أوى

كافيه كله بنات وأقعد أنا وصحابى البنات براحتنا نتكلم نضحك نزعق نضرب بعض أحنا حرين

أقلع الحجاب أو أفضل لبساه

براحتى بقى مع احنا كلنا بنات

ليه عايزنى أقعد فى البيت وبس

هو انتوا يعنى لما بتروحوا كافيه كلهم صبيان وشيشه وحاجات مقرفه

حد قالكوا اقعدوا فى البيت أحسن

ولا هى الكحكه فى أيد البنات عجبه؟؟؟؟؟

جايه أرخم

اه والله أنا جايه أرخم

كتبت خاطره كده بس محدش يضحك

وقلت بقى أرخم عليكم وأشوف رأيكم فيها

بس عايزه اللى يكتب تعليق يقول رأيه بصراحه وانا مش هزعل

أريد يوما أن أحيا بلا قيود

بلا نظرات أناس لا يجيدون سوى العزف على أخطاء غيرهم

عزف لحنا ردىء تستاء منه الاذن

يلاحقونك فى كل أتجاه

سهام من النار تصوب ناحيتك

أصوات من سياط يجلدونك بها

وذنبك أنك تحيا بتلقائيه

وذنبك الاكبر أنك تحيا بينهم

ولكن ما الذنب فى هذا أو ذاك ؟

يريدونك أن ترقص فقط على أنغامهم

واذا حاولت أن تصنع لنفسك لحنك الخاص

أعتبروا هذا نشاذا

وأنهالوا عليك بوابل من الانتقادات

لست سوى فتاة أريد أن يكون لى عالمى

ولست سوى فتاة لا تجيد ارتداء الاقنعه

ووسط كل هذا أهرب الى حبك

هذه هى مملكتى

صنعتها هنا بين أحضانك

وأعتليت مسرحى وأخذت أشدو

أشدو لحنا لك وحدك

لحن حب عزفته هنا بين أحضانك

بعيدا عن عيون الناس

الى كل أسره ...ربوا عيالكوا بقى حرام عليكو

اه والله بجد مش كده حرام عليكوا فعلا ربوا عيالكو

مش معقول كمية المعاكسات والتحرش اللى بتتعرض له البنت فى الشارع خليتوا البنات مش قادره تخرج من البيت

كل واحد عنده وقت فراغ ينزل الشارع يعاكس فى بنات الناس بكلام سخيف ووحش فعلا وياريتها بتيجى على الكلام وبس

أتقوا الله فى ولادكم وفينا ربوهم تربية دينيه سليمه عرفوهم الحرام والحلال والصح والغلط

بقت ظاهره مينفعش أبدا نسكت عليها

الاول عايزه أسأل ليه البنات بتتعرض للمواقف دى فى الشارع؟

أول سبب :أنها بتلبس قصير؟

لا والله حتى اللى بيلبسوا طويل بيحصل معاكم كده

طيب تانى حاجه

بتلبس ضيق؟

لا والله اللى بتلبس واسع بردو بيحصل معاها كده

مش محجبه؟

المحجبات والمتقبات كمان بيحصل معاهم كده

يبقى أيه بس الحكايه

طيب بلاش

تعالوا نشوف مين هى الفئه اللى ماشيه تعاكس فى بنات الناس

الشباب كلهم اللى بيشتغل واللى مبيتشغلش يبقى البطاله مش هى السبب

الرجاله الكبار والله العظيم بيعاكسوا البنات ودى حصلى أنا شخصيا

الاطفال الصغيرين كمان انتقلت لهم العدوى وبقوا يعاكسوا اللى رايحه واللى جايه

فعلا بقى الخروج للشارع شىء صعب جدا وانا شخصيا كرهت اخرج من بيتنا

لو سمحتوا اتقوا الله فينا شويه واعرف انه كما تدين تدان سيبونا فى حالنا

وكل واحد وواحده لو سمحتوا ربوا عيالكوا صح

وكل بنت من فضلك متلبسيش ضيق لو سمحتى يمكن يتهدوا شويه

وفى الاخر انا عايزه اقول حسبى الله ونعم الوكيل