كثيرا ما نختلف على عمرو خالد
ولكننا دائما نتفق على أنه الداعيه الاسلامى الاقرب الى قلوب الشباب وأنا منهم
محستش بالدهشه قد ما حسيت بالفرحه لما شفت الداعيه عمرو خالد داخل الكنيسه الكاتدرائيه فى الاحتفالات بعيد الميلاد
وليه لاء يا جماعه؟
وليه ما ندوبش جبل التلج اللى بينا ده ونقول أحنا لازم نكون سوا
لاننا بجد لازم نكون سوا
أى خلاف بينا مش هنستفاد منه شىء غير الفتنه والمشاكل والانقسام داخل مصر
والمستفيد فى الاخر الخارج
مدام كلنا بنحب البلد دى يبقى ليه لاء وفى الاخر لهم دينهم ولنا دين
عمرو خالد صرح لعمرو أديب فى برنامج القاهره اليوم أنه ذهب للبابا شنوده يعرض عليه العمل المشترك بين شباب المسلمين والشباب المسيحى ضد المخدرات التى لا تفرق بين دين وأخر ولكنه أبتلاء لجميع شبابنا
وده اللى فرحنى أوى أحنا لازم نكون مع بعض
ياريت كل أم وكل أب بلاش نعلم ولادنا يفرقوا بين زميلهم المسلم وزميلهم المسيحى لاننا فى الاخر ولاد البلد دى
مصر مليانه مشاكل بلاش كمان يبقى فى بينا وبين بعض مشاكل وأنقسام وفتنه
خلى البلد دى تقف على رجليها بقى
أحنا لازم نكون سوا
36 comments:
تمام و الله
لازم نكون سوا
و علي فكرة الحكاية دي من زمان
التعصب اللي ساعات بنسمع عنه
نادر جدا و مظهرش الا اخيرا
زمان جدتي تحكيلي عن صديقاتها الاقباط
و اد ايه يحبوا بعض
و في العيد ياكلوا الكحك معانا
و رمضان عمرك متشوف واحد بياكل ادام مسلم
لأننا في الاخر بشر
و عايشين مع بعض
ربنا يجازي الاستاذ عمرو خالد خير
و يجازيكي خير الجزاء علي البوست
و الموضوع و الهدف الرائع دا
تحياتي و تقديري
:)
والقادم اجمل
والله ولسه لحد دلوقتى فى ناس بتحب بعض
انا ليا صديقتى اسمها ساره من ثانوى وبحبها اوى وهى كمان
وفى مستر اسمه مجدى كان بيدرسلنا احياء
من اكتر الناس اللى بحترمها وبحبها جدا
المهم نتعلم نحب بعض
البوست جميل أوى والله وبجد هدفه سامى جدا وأد أيه فعلا" عمرو خالد ده إنسان بسيط وزى ما انتى قولتى هو الأقرب لقلوب الشباب وإن شاء الله المحاولة دى تنجح انها تشيل الفروق بينا وترجع العلاقة بينا زى زمان لاتسودها شوائب الفتنه وخلافه وأفتكر انهم زمان كانوا بيقولو " الدين لله والوطن للجميع" فعلا" شعار رائع ياريت يرجع العمل بيه تانى
جزاك الله خيرا" يا هند انتى والأستاذ عمرو خالد ربنا يبارك لك
سلااااام
كل سنه وانتم طيبين
وحبيت أعزمكم على حفل افتتاح دار الكتب بتاعت صاحب البوابه , زميلنا البلوجرى الفظيع
ودا هايكون يوم الخميس 10 يناير الساعه 6 مساءا فى مكتبة البلد , 31 شارع محمد محمود بالتحرير
عاوزين تواجد مكثف هناك
مستنيينكواااااااااااا
مستجده
ياريت ده يبقى هدفنا كلنا
مش بس عشان الحمله ضد المخدرات او ضد اى حاجه تانيه
لاء عشان أحنا عايشين سوا
عشان أحنا بنحب البلد دى
عشان كفايه المشاكل اللى ماليانا
بلاش أحنا كمان نيجى على بعض
أحنا همنا واحد
ولازم نساعد بعض
وينكى
أنا لما بتجيلى دعوه زى دى بحزن
لانى مش من القاهره ومش بقدر اكون موجوده فى حاجه زى دى
فحس انى خسرت كتير اوى
ميرسى لزيارتك
اتمنى انها تتكرر
والله العظيم كلام ف الجوون
لانى انا كمان متبنيه نفس النظريه ..
احنا كلنا بشر وموحدين بالله بنعيش ف مكان واحد
وبتجمعنا اصول واحده وعادات مجتمع واحد
فعلا احنا منهم وهما مننا
مين مكانلوش صاحب او جار او زميل دراسه
منهم
مسلمين او مسيحين فنحن موحدين بالله
ولكم دينكم وليا دين
كلامك ولا اروع
د/أجدع بنوته
كويس أوى أنك متبنيه نفس النقطه
يمكن أنا وانتى وغيرنا نقدر نعمل حاجه
بووووست هاااايل
والاستاذ عمرو خالد ربنا يكرمه ويقدره على اللى بيعمله
دة اكتر واحد بياثر ف الشباب بجد
nada
ميرسى لزيارتك يا ندا وطبعا عمرو خالد اقرب داعيه لقلب الشباب
الفتنه مش بتحصل منى ومنك ومن الناس العاديين
لا
الفتنه موجهه
منظمه
بيقوم بيها ناس معروفين وليهم اهداف
لكن انا وانتى وكل المسلمين والمسيحيين عايشين مع بعض من غير اى ضجه ولا فتنه ولاغيره
فرنسا
عندك حق
بس الناس دى بتعرف ازاى تأثر فيا وفيكى وفى أخوانا المسيحين وتشعل النار بينا عشان كده لازم نبقى مع بعض ونعرفهم أن كل خططهم مش هتنجح عشان أحنا سوا
بس بلاش ننكر أن فى ناس متعصبه من الاتنين
ربنا يكرمك أختنا
Bella
الاستاذ عمرو خالد أفتاه الدكتور القرضاوى
بجواز هذا الفعل
الوقتى بعض الناس بتهاجمه عشان راح لهم
رغم ان الفائدة عظيمة
و مش مطلوب مننا ننعزل عن النصارى
هما شركاء فى الوطن
أنا بصراحة من محبى هذا الرجل
و أسأل الله أن يسدد خطاه
و أن يفتح على يديه الكثير لأمتنا
شكرا جدا أختنا
على الموضوع المهم جدا حقيقى
د.حمـــــــاس
بوست فعلا جميل
والجميل جدا كمان موقف عمرو خالد
هو فعلا داعيه متميز جدا
يكفى انه الداعيه الوحيد اللى مش بيتكلم وبس لاء ده ككمان بيحاول دايما يعمل شئ جديد
ربنا يكرمه
خالص تحياتى لكى
بالضبط لازم نكون سواء ولازم نقتنع تمام الاقتناع انى الخطر مش حيفرق البطش والاتعذيب والقمع والظلم مش بيفرق بين مسلم ومسيحى لاننا فى مركب واحده يا نعيش وساء يا نموت سواء
د/حماس
أنا كمان بحب الداعيه عمرو خالد وبحترمه بجد
ميرسى لزيارتك
نورت المدونه
ra7eel
عندك حق وياريت كلهم يعملوا زيه
رئيس جمهورية نفسه
كلنا فى مركب واحده
كلنا تعبنا
بوست حلو يا هندودة وجاى فى معاد كويس
خصوصا اننا كنا من كام يوم بنحتفل باعياد الكريسماس وكمان براس السنة الهجرية
بس ياريت فعلا الناس تعمل بكلامك ويكونوا سوا
لحسن انا بسمع حكايات وبشوف حاجات بتحصل قدامى تخلينى استغرب على الحال اللى احنا وصلناله
احنا ماكناش كدة ابدا زمان
ايه اللى جرى
وليه كل واحد مش متقبل دين التانى
انا مالى اذا كان اللى قدامى مسيحى ولا مسلم
انا ليا بطريقة التعامل لو بيعاملنى كويس اهلا وسهلا هافتحله قلبى وعقلى
لكن هايعاملنى بقلة ادب
هاقوله مع السلامة
ليه الناس بتبص للى قدامها على اساس الديانة وبس
الدين لله
مش لينا
بوست جميل يا هندودة
اختك خيخة
خيخه
بصى أنا عايزه أقولك حاجه
أنا مش عارفه بجد الناس مالها
الكلام عن الاخوه المسيحين هيودينا للكلام فى حاجات تانيه
أحنا مش بس بنبص للدين أحنا كمان بنبص للجنسيه أو البلد اللى جى منها
يعنى من فتره الجرايد الكويتيه والجرايد المصريه كانوا بيشتموا فى بعض
النهارده راكبه تاكسى وأنا راجعه من الامتحان بردو حصل أودامى كلام على بلد عربى معجبنيش وكلام على مصر وجعنى أوى من جوه
ياجماعه كفايه المشاكل اللى البلد فيها والمنطقه العربيه كلها فيها
تعالوا نحب بعض يمكن الحب ده يخلينا أحسن
وأكيد هيخلينا أحسن
والله يا هند انا كمان فرحت جدا لما قريت الخبر ده كمان
ياريت نرجع زى زمان زى ما كنا بنسمع
خلينا نتحرك لقدام بقى
بوست حلو اوى على فكره
هو كويس اننا نكون سوا بس مش ظاهريا لان عندنا فى مصر ظاهريا فقط انما داخليا احنا بعاد عن بعض تماما وعموما مش مسلمين مع مسيحيين فقط ولكن مع بعضنا كمسلمين وده بيحزن جدا
لماضه
ميرسى لزيارتك
واحنا نقدر نعمل ده عشان نتقدم بقى
appy
احنا فعلا نتعلم ازاى نحب بعض
أوكي
لازم الاول نتقبلهم
فيه ناس كتير مش بيتقبلوا الاخرين أصلا سواء كانوا مسلمين أو مسيحين
المشكله اننا اتربينا علي اساس اننا بس اللي موجودين ومفيش وجود للأخر أو ليه وجود بس لازم تتجنبه
بصراحه مع كل دعاوي التاخي وكل الكلام اللي بيتقال ده فيه شرخ كبير في البناء الوطني لمصر
فيه ان الثقافه العامه هي رفض الاخر وأحياننا تكفيره
أعتقد ان كل الرواسب الفكيره الموجود لن يذيبها مجرد حضور أحد الدعاه مهما كانت قيمته احد أحتفالات الاخوه المسيحين أو حضور أحد القساوسه للجامع الازهر
الموضوع أكبر من هذا
الموضوع
ثقافة شعب
تحياتي
alshared
انا معاك ان دى ثقافة شعب
طيب هما مين الشعب
مش انا وانت ولماضه واحمد الصباغ وخيخه وفرنسا وغيرنا وغيرنا
طيب ما تيجى نتغير
ما تحاول تسيبنى اتكلم وتسمعنى
واسيبك تتكلم واسمعك
تعالى فى عيدى قولى كل سنه وانتى طيبه واجى فى مناسبه عندك واهنيك
احنا الشعب يا شارد
يلا بجد نحب بعض يلا نسمع بعض
مدام عارفين اننا فى غيرنا
تعالى نسمعه تعالى نحبه وتعالى نقوله ايدى اهيه انا بمدها عشان نبقى سوا
بجد لو حاولنا اكيد فى حاجه هتتغير
الموضوع المفروض يكون عادى فعلا ودعوة للتعايش وكل حاجه برغم رد الفعل المضاد عند البعض
الا انى اامل انها خطوة تقدر تصلح العلاقات الى باظت وبقى بيشوبها عدم الثقه
واتمنى اننا نعيش فى سلام من غير محد يدخل بينا ويخربها
وربنا يستر
على فكرة ديننا بسيط قوى وكل واحد عارف ان نقاط الضعف والقوة بتيجى من النفس البشرية
اقصد احنا اللى بدل منستخدم ديننا صح ونعيش فى سلام بنقف لبعض عالواحدة وبنضايق بعض وللأسف بنغلط فى الدين اللى المفروض اننا نتبعه
تحياتى
وربنا يهدينا لصالح الأعمال
هبة
shyma
هى فعلا دعوه للتعايش
ويارب محدش يخربها
doba
ربنا يهدينا جميعا يارب
ونتبع الدين صح ويزرع المحبه فى قلوبنا
ياسلام اهو عمر دة مثال للانسان الى بجد
عارف ربنا خلقه ليه وعشان ايه وبيحاول وبكل بجهده انه يحققه مهما بلغت المصاعب بيه ومهما كثرت المطابات الصناعية والطبيعية قدامه
اولا انامش عارف ليه ديما بنفرق مابين بعد عشان الدين
هما مسحين احنا مسلمين دة كلام عبيط واسف على الكلمة
بس مافيش حاجة اسمهما مسلم مسيحى يهودى
فى حاجة اسمها بشر من حقها تعيش ومن حقها انها تخاف على بلدها ومن حقها انها تدافع عنها قصاد
اى خطر بيهددها
ومش من حق اى حد انه يمنعهم
لانه مش احسن منه
ربنا خلقهم زى مخلقنا
لفينا حاجه زيادة ولا هما فيهم حاجة ناقصة
الاختلاف الوحيد الى بينا هو الاسم دة مسلم ودة مسيحى
مع ان الى الاديان لله
والاسلام والمسيحية اديان سماوية
نزلت من عند ربنا
ممكن يكونوا مش مؤمنين برسولنا
بس الى بيحاسب هو ربنا
هو الى حيعاقب المخطئ يوم القيامة
انا بجد فرحت اوى لما عرفت ان عمر خالد راح الكنيسة
لان فيه ناس بتحب عمر وبتحب تشوف هو بيعمل ايه عشان تعمل زيه قدوة يعنى
ودى ممكن تساعدهم على انهم يغيره طريقة تفكيرهم شوية
وياريت بجد شباب مصر كلهم مسلمين على مسيحين يبقوا ايد واحدة
ممكن وقتها بجد مصر تتغير وتتقدم بينا
حلو
اهلا اهلا يا هنوود
عود حميد للتدوين
بس ما ترجعيش فى الخفاء كدة لازم نعرف عشان نعمل ليلة ونقيم الافراح
بصى يا ستى
طبعا احنا مش هنختلف ان التقريب بين المسلمين وبين المسيحين فى مصر شئ جميل جدا ومطلوب
انا شخصيا اعمل فى شركة أصحابها رجال اعمال مصريين مسيحين
وبحبهم كتييير
لكن طبعا انا مش هتتطرق لمواضيع جانبية تخص عمرو خالد
بس هكتفى انى اقول انه مبقاش الاقرب لقلبى
ويمكن مابقاش من الدعاه اللى بسمع لهم .. وعلى فكرة وقبل ما حد يتكلم مش انا بس ولكن كتير جدا من الشباب
اللى كان بيدافع باستماتة عن عمرو خالد ساعة النفى وساعة المنع من الخطابة
هو اللى تقزز لما اعلن انه بيشجع تامر حسنى وبيتصل به يوميا عشان يشجعه
قال يعنى مش فاهم ان تامر حسنى عايز يحسن صورتة بعد السجن فبيتمسح فى داعية مشهور
وهو نفس الشباب اللى تقزز لما لاقى عمرو خالد بيقول الرسول ما كنش يقصد ان الستات ناقصات عقلو دين ده الرسول كان بيهزر
لكن عموما لفتة كويسة منه ان يزور البابا فى عيد المسيحين
وكل سنة وأقباط مصر بخير
تحياتى
أحمد الصباغ
زعيم كمورا مورا
زى ما عمرو خالد عارف ايه هى رسالته لازم أحنا كمان نكون عارفنها ونحاول نوصلها لكل الناس بتصرفاتنا
وافعالنا
ميرسى لزيارتك
not crazy
انت أحلى يا سيدى
الله يكرمك وشكرا على الزياره
أحمد الصباغ
صديقى اللدود
بص يا سيدى أحنا لو فتشنا فى حياة كل داعيه والله هتلاقى حاجات متصدقهاش
فى داعيه فى قناة الناس وبيظهر فى اقرأ كمان وده اللى عرفته مؤخرا كان مكتوب عنه كلام فى جريده المصرى اليوم أو الدستور مش فاكره بالظبط وأول ما شوفته فى أقرأ حسيت ان الكلام ده بجد
هو م.ح
انا مش عايزه أكتب الاسم كامل عشان مظلمش حد وممكن يكون الكلام عنه مش صحيح
بس محدش ينكر ان عمرو خالد قريب من الشباب
ومحدش ينكر أن عمرو خالد بيعمل حاجات كويسه وهو الوحيد اللى بيحاول يعمل حاجه مش قاعد يفتى فى التليفزيون وخالص
ولما حد يعمل حاجه كويسه يبقى لازم نقول أنها كويسه
ملحوظه رفيعه بقى على جنب
أنا مبحبش تامر حسنى ده خااااااااالص
كنت بحب أسمعه دلوقتى بيجيلى حساسيه لما أسمعه أو اشوفه
Post a Comment