من خلال نظرتى الفاحصه الماحصه خلال الايام الماضيه
لاحظت أن الناس أصيبت بحاله من قلة الذوق
بمعنى أنك تبقى ماشى فى الشارع وحد يخبط فيك وميعتذرش
أو يرش عليك ميه ويبقا تنح بردو وميعتذرش
والحاجه اللى بتحصل معايا بقا أن الجيران اللى فوقينا بينشروا غسيلهم على غسيلنا والميه تغرق الغسيل وميقولوش من فضلكم غطوا غسيلكم
ومره كنت واقفه اودام محل بتفرج على حاجات ولقيت البنت اللى فى المحل اللى جنبه طالعه تنفض التراب وأنا واقفه جمبها بالظبط ومقالتش
من فضلك ابعدى شويه عشان أنضف
فالموضوع ده لفت نظرى اوى اوى اوى أن الناس أصيبت بحاله من قلة الذوق
تفتح بلكونة بيتكم عشان تشم الهوا تلاقى واحد بيدرس الموقع الجغرافى لشقتكم
فتضطر أنك تقفل البلكونه فى وشه وتدخل تتفرج عالتليفزيون اللى غالبا مبيعرضش حاجه مفيده
Saturday, July 19, 2008
هو فى أيه؟؟؟
Posted by 3ala asm masr at 10:57 AM
Subscribe to:
Post Comments (Atom)
28 comments:
هي فعلاً حاجه مستفذه
وفعلاً الناس بقت كده وأنا اتكلمت في بوست عندي على على طريقة الناس دي بجد عالم مستفذه
http://re7abmostafa.blogspot.com/2008/04/blog-post.html
هند أكيد في أنعدام في الزوق زي كل حاجه في المجتمع بتاعنا
كلنا أو معظمنا بينحدر الي هاويه من الانعدام
أنعدام الخلق
وأنعدام الدين
وأنعدام الضمير
.
.
.
دي بقيت حاجه عادي جدا
ولو خبطتي في ةاحد وجيتي تعتذري هايبصلك بصه معناه أيه العبط ده
لانه أساس مش بيقدر قيمة الاعتذار
تحياتي
السلام عليكم ورحمة الله وبركاته
الموضوع ببساطه انه هو ده بقي حالنا كلنا لو دورنا في افعالنا هنلاقي نفسنا بنعمل حجات فيها قلة ذوق
بس بتختلف من شخص لاخر في الدرجه اللي وصللها من قلة الذوق
تقبلي مروري
تحياتي
http://myfreedom-spower.blogspot.com/
لو بصيتي على الحاله الاجتماعيه بتاعة الشعب هتلاقي اننا في حالة انهيار وتدهور اخلاقي مستمر
يعني قيسي على كده كل تصرفات الناس حواليكي هتلاقي ان الحياء والادب بقو سلعة نادره جدا
ولما حد بيتعامل مع الناس باحترام بيعتبرو ده ضعف
للاسف المجتمع ككل عمال يتدهور كل يوم اكتر من الاول .. ومش عارف ايه علاج ده
عموما ربنا يخرجنا من دار البلا بلا بلا
سلاموووووووووز
rehab mostafa
ما احنا لازم كلنا نتكلم يمكن فى الاخر حاجه تتصلح
alshared
والله عندك حق أحنا بنعيش حاله من الانحطاط فى كل شىء
spower
بس الموضوع بقا صعب اوى
soooooo
للدرجه دى بقا الاحترام هو الحاجه الشاذه؟
ياااااااااااااة
مش لازم بقا اغلط فى الناس وفى المجتمع وكدة يعنى
بس هتعملى اية لو عندك حل قولية
بس انا عاوزة اعرف مين اللى رش عليكى ماية دة ؟؟؟؟؟؟
بس انا عندى اللى مش بيحترم الناس اكيد مش بيحترم نفسة والا حتى اهلة
وعندة كل الدنيا مساوية بعضها
انا قريت كدذا بوست وما شاء الله جميل البلوج جميل جدا
اما بالنسبة للاعتذار والذوق فلاعزاء للمهذبين
انا واحد صاحبي بيزعل لما استئذن منه قبل اي حاجةاو اي طلب وبيتضايق ويحس ان دي حولجز بينا..
يعني الادب حواجز
ما علينا..
مدونة لطيفة فعلا..
تحياتي :)
اولا وحشنى البلوج بتاعك اوى مع انى لسه داخله من كام يوم
بس واحشنى انى اكتبل كومنت
ثانيا متستغربيش يا حبيتى احنا في مصر يا قلبي يعنى قله الذوق طبيعيه هنا
وكله كوم واللى بيدرسوا الموقع الجغرافي ده كوم تانى
حاجه تخنق وتزهق
أخبطلي تعليق
كنت في الشارع وست طوحتني من على الرصيف مش خبطتني من شدة الخبطة لأن وزني مش تقيل عشان أثبت على الارض قلتلها مش تستني لأنها لم تنتظر اني أوسع لسيادتها قامت مزعقة فيا ازاي بعترض على الخبطة على اساس انه مش قصدها فتعجبت أختي قائلة
هي أصلاً اعتذرتلك قلتلها ابدا
عارفة فيه ايه فيه فساد سياسي أدى لكل ده والله
كتاب عبد الرحمن الكواكبي عند مدونة ليبرالي مصري حمليه واقريه حيجاوب عن سؤالك
اللي عنده ذوق بقه رجعي ومتخلف
دمتي بكل خير
doda
لاء اغلطى يابت اغلطى
ههههههههه
لاء عادى واحده جارتنا ساكنه فوق بس الشهاده لله هى مرشتش ميه هى نشرت غسيلها فوق غسيلنا فغسيلنا اتغرق ميه
mero
شكرا على رايك فى المدونه ويارب ديما تعجبك
فعلا لا عزاء للمهذبين
دا بأه حاجة عااااااااادية
و بتخنقني جدااااااااا
مش هتتعب لو استأذنت أو اعتذرت
أو أو أو
بجد حاجة تضايق
---
إحترامي و تقديري
:)
لولا
أنا قررت ان بتوع الموقع الجغرافى دول أرش عليهم ميه
l.g
تفتكر ان الفساد السياسى هو سبب كل انواع الفساد فى المجتمع ؟
والقادم اجمل
هى حاجه بتخنقنا كلنا
هى وده الطبيعه لمصر لما بتضغى الماديات الوحنيات والاخلاق ومنها الذوق بتنخفض لحد ما قربت بتوصل لمرحلة العدم
رئيس جمهورية نفسه؟
انا عندى احساس بان كل حاجه بتوصل لمرحلة العدم
الناس كلها قرفانة
ومافيش مانع لما يقرفوا ناس تانية
اشمعى هم يعنى اللى قرفانين
بيتهيألى هو دة سبب قلة الذوق
ثم كان زمان فى اختراع اسمه وزارة التربية والتعليم
وللأسف دلوقتى لغوا الاتنين لا بقى فى تريبة فى المدارس ولا بقى فى تعليم ولا بقى فيه مدارس من أصله الكل بياخد دروس خصوصية
ما هى دى سياسة خصخصة التعليم
ثم كان فى زمان بيت بيقول الام مدرسة اذا اعددتها اعددت شعبا طيب الاعراق
فين الام دلوقتى؟؟
الام يا إما مطحونة فى الشغل زيها زى جوزها ومعندهاش وقت تربى وتعلم الادب والدين والزوق
يا إما مشغولة فى النادى او الكوافير او عالنت اوى حاجة غير انها تنشغل بيعالها وتربيهم وتعلمهم الزوق
هى البلد باظت من شوية ؟؟
سبهلله
لاء باظت من كتير ومن كتير اوى كمان
تصدقى؟ اول مره اخد بالى من موضوع خصخصة التعليم ده وفعلا عندك حق
وموضوع الام اللى مش بتربى ده عاوز بوست لوحده
بحاول ادور على اسباب ما تكونش اتطرحت فى النقاش لأن تقريبا كل حاجة اتقالت وزيادة
بس ممكن يكون التكنولوجيا العالية والضوضاء الهايلة والمؤثرات الصوتية والبصرية أثرت عل ى باقى الحواس وعلى الأعصاب
أصل إحنا فعلا عايشين حالة هياج بس مش واخدين بالنا
شوفى كدة لما النور بيتقطع شعورك بيبقى ايه وأعصابك بيجرالها ايه .
أنا لما باروح عند أمى ما باحسش بالود والألفة بينى وبينها وبين أخواتى غير لما أخطف ريموت التليفزيون وأطفيه
فى الأول الكل بيتضايق من رخامتى جدا لكن بعد كدة بتلاقى كله اتلم حوالين بعضه وشوية نكت وشوية زكريات على معلومات على روحانيات حتى الاطفال بتتلم حوالينا ويسمعونا ويبطلوا الدوشة والصداع اللى بيكونوا عاملينه
موضوعك فعلا مثير ويمكن يكون لسه فيه أبعاد تانية
مع اسمى تحية
سلام الله عليك
ورحمته وبركاته
هو فيه قله ذوق بيقابلها منى نرفز عارمه وبصه رخمه وممكن توصل للفت انتباهه بالذوق او بنفس طريقته بس
انا مع سوو
طاب تصدقى انى مره كنت ماشى فى شارع جانبى
وفجأه لاقيتنى استحميت
أه والله
واحده ست
ربنا ياخدها
مش عارف كانت بتعمل ايه وبترمى الميه فى الشارع
كأننا فى العصور الحجريه
واللى يغيظ انى ماتكلمتش
بس بصيت لفوق لاقيتها بصالى وهى بتضحك
انا جاللى شلل رباعى يومها
واضطريت الغى المشوار اللى كنت رايحه ورجعت استحيمت عشر مرات
طاب السؤال افرض كنت رايح امتحان كنت عملت ايه؟؟
ربنا ينتقم من العينه دى
تحياتى على بلوجك الجميل
مع اصرارى
من كلامكم حاسه اننا فقدنا حاجات كتير اوى اوى
مش بس الاخلاق والذوق وطريقة تعاملنا مع الناس
فعلا واضح ان الموضوع له أبعاد تانيه كتير أوى
appy
مهو كل فعل له رد فعل
oss
انا فعلا مش عارفه لو كنت رايح امتحان كنت عملت ايه
بس فعلا فى ناس كده تعمل العمله وتنح
ربنا يرحمنا برحمته
Post a Comment