من حقك تعيش فى مكان كله خضره فى الوقت اللى فيه ناس كتير مش لاقيه أربع حيطان يلموها
من حقك تصيف السنه دى وتدفع على مهلك فى الوقت اللى فيه ناس مش لاقيه حق الرغيف
ولما تمشى البيت هيتنضف لوحده وبردو هيتأجر لوحده فى الوقت اللى فيه أطفال لسه أسمهم أطفال الشوارع
من حقك تعيش فى مكان نضيف وهواء نضيف وحمامات سباحه وملاعب جولف فى الوقت اللى فيه ناس مش لاقيه حق الدوا
وبتعيش فى الخرابات وسط الزباله زى الكلاب وبيشموا كولا تحت الكوبرى
وفى بردو ناس بتموت فى المستشفيات
من حقك تنعم بالرفاهيه فى الوقت اللى فيه ناس مش عارفه تنعم بلقمه نضيفه
شتان الفارق بين حال الناس بجد فى الشارع وحال الاعلانات اللى بتقولك أنه من حقك
من حقك بس لو أنت حرامى ومعاك فلوس
عشان محدش يطول لسانه ويقولى وأنتى بقا بتفكرى فى الناس دى وأنتى قعده بتتفرجى عالتليفزيون
هقوله لو مكنتش بفكر فيهم مكنتش كتبت البوست ده عشان كلنا نفتكرهم
18 comments:
قولى يـــارب
هىهىهىهىهى البلد كلها بقت بتلعب
جولف
ربنا عاوز كده بس فيه حاجه اسمها تكافل اجتماعى او الذكاه علشان نساعد بعض بس تقولى لمين
هى بس اعلاناتهم مستفزة فى الفترة دى
د/ أجدع بنوته
فعلا البلد كلها بتلعب جولف شكلهم كده هيهدونا بيوتنا ويعملوا بدلها ملاعب جولف
appy
مش بس الاعلانات أنا حاسه أن البلد دى مش بتاعتنا
حاسه أنها متأجره مفروش
اممممممممم
هو المفروض فعلا نفكر فيهم
جزاك الله خير ..
بس ميمنعش اني العب غولف برضه..
ذلك فضل الله يؤتيه من يشاء مادام بأدي حق الله..حتى الناس اللي مبتلعبش غولف ولا عندها ملايين وعمارات لازم تفكر في الغلابة ..
أعتقد مفيش علاقة..
دمتي بخير..
كل سنة وانتي طيبة :)
انا من رأيي ان لازم يكون فى طبقات
والا مكنش هيبقى فى دكتور وفلاح ده يعمل الزرع علشان الكل ياكل وده يداويه لو تعب وقيسى على ذلك
بس دلوقت المشكله ان الطبقه الفقيره بقت كتير جدا
بل والطبقه المعدومه بقت كتير بردو
علشان كده
انا حاسس اننا خلاص بدأنا العد التنازلى فى حكم مبارك وبتوقع يكون فى حرب جامده جدااااااا بعده على الحكم
مفروش يا نهار
طيب لمين لا كده كتير بقى
على فكره ده الاحساس اللى بيولد الياس بلاش منه
على رأى د/أجدع بنوته
قولى يارب
بس تعرفى ان حتى الحقوق بقى غير معترف بيها يعنى بيحاولوا يطمسوا حتى الإسم
تحيــــاتى
المصــــــــــرى
موضوع مؤثر بجد...
فيه صدق في الإحساس..تجاه المظلومين..الأطفال دول..
................
انتي فكرتيني ..بموقف..أثر فيا جداً..
وكان نتاجه قصيدة..لأطفال الشوارع..
.....
كنت ماشي في مرة..ولاحظت ولاد من اللي القدر سماهم أطفال الشوارع...
بينطوا سور حديقة مقفولة...
ودخلو يتمرجحوا...والبسمة الحزينة...على خدودهم..
.............
ساعتها فكرت..
هما مش ليهم حق يحسوا انهم أطفال!!
................
وكانت القصيدة..هيه الإجابة..
........
العاصفة
.......
http://mohammedfikry.blogspot.com/2008/08/blog-post.html
شكراً ليكي على الموضوع ده..وكل سنة و انتي طيبة
mero
انا مقولتش انه مش من حقك تلعب جولف بس تفتكر ينفع اعمل اعلان واقول فيه من حقك ومن حقك ومن حقك فى الوقت اللى فيه ناس مش لاقيه ابسط حقوقها واللى هو اربع جدران يلموهم ولقمة عيش يلكوها؟؟؟
عايش ولكن
المفروض يبقى فيه طبقات
بس هى فين الطيقات دى
الفجوه عماله تزيد بطريقه مرعبه
appy
لاء ولا يأس ولا حاجه
الامل ف الله كبير
almasry
والله ديما بنقول يارب
لنا الله
محمد فكرى
شكرا ليك واوعدك انى هقرا القصيده
ياه صورة البنت دي مش مجرد بنت من أطفال الشوارع هي بقيت في مجتمعنا رمز للحرية والأمان
هي فرد جت الأرض ونزلت من بطن مامتها في جو أسوأ بل لا يقارن بالجنة اللي كانت عايشة فيها كانت زيها زي أي جنين تاني في بطن أمه مهما كان وضع أهله ماكنش فيه فروق ولا ظلم ولا تعالي
للأسف الطبيعي أن حياتها في الأرض تبقي أحسن لأن نزولها عالأرض نعمة من ربنا بس لأن مافيش حرية ووعي تحولت النعمة في نظرها إلي نقمة يتفق عليها الجميع ولا يشارك في إزالتها ولو شخص واحد مش بالكلام ولا حتي جمعيات
للأسف لازم تغير نطام المجتمع ويتقسم رزق البلد علي كل فرد
يعني بكل بساطة الضرايب مثلا اللي بتدفع لو تروح لأهالي أطفال الشوارع هيتغير الأسم ويبقوا أولاد الفقرا وده الفرق بينا وبين اوروبا هناك مثلا في فقراء بس محدش بيعيش في الشارع غصب عنه ,
هنا الشارع بقي أب للمصرين ,هي دي مصر؟ أغني بلد وأغلي حضارة؟
أشك
موضوعك أجبرني علي التعليق
تحياتي جداااااااااااااا
ويا عيني يا مصر
roufi
عندك حق الضرايب دى لو حتى يتعمل بيها مكان يلم الاطفال دول
يتعملوا فيه ولو اشياء بسيطه بدل ما يتعلموا السرقه والشحاته و تعاطى المخدرات
ويبقوا ناس تنفع مصر بدل ما يبقوا قنبله موقوته هتفرقع فى وشنا قريب كان اكيد فى حاجه اتغيرت
الضرايب مصلحتك اولا
عيد فطر سعيد اعاده الله عليكم باليمن والخير والبركة ، وادام سعدكم وحقق احلامكم
Post a Comment