CLICK HERE FOR THOUSANDS OF FREE BLOGGER TEMPLATES »

Tuesday, December 9, 2008

أذكروا محاسن موتاكم

فى حاجه مضياقنى أوى

هى الكلام على الناس اللى أنتقلت اللى رحمت الله وسابت الدنيا باللى فيها وقابلت وجه


الكريم

وهو اللى هيحاسبها ويديها جزاءها اللى أحنا قطعا منعرفش أيه هو

الاول أتكلمنا على سوزان تميم واللى جرالها متجوزه أتنين لاء مش متجوزه

طلعت مصطفى اللى قتلها لاء مش هو أيه الحكايه فين منين

وكل واحد حكى الحكايه اللى هو شايفها صح ف حين ان ربنا بس هو الاعلم باللى حصل

تانى حاجه اللى بيحصل اليومين دول من كلام فى قضية هبه ونادين وطبعا عشان هبه بنت



ليلى غفران أتقال ياما ف الخمر من كلام

عليها وعلى صديقتها

أنا مش هقول أن أنا مقتنعه بحكاية السرقه والواد اللى جابوه وقالوا ده الحرامى وهو اللى


قتلهم وبتاع

وده عشان كذا حاجه عشان الواد ولا جسمه ولا شكله ولا سنه يخلوه يعمل كده

ولا كلامه نفسه وهو بيتكلم يقدر يقنعك بان ده اللى عمل كده و ف برنامج العاشره مساء ليلى


غفران كانت موجوده وقالت بنفسها انها مش مقتنعه

لكن الللى مضايقنى الكلام فى شرف حد بقا بين أيدين ربنا أصلا

أه طبعا لازم نعرف الحقيقه لان متهيالى أن القضيه مش بس قضية بنتين أتقتلوا بطريقه


وحشه

لكن حاسه أن القضيه دى لازم تغير فى الاعلام والصحافه والامن كمان شوية حاجات

بس بلاش أحنا نتكلم ونقول كان فيه وكان فيه ونقول تلاقيها هى وصاحبتها دول كذا

لاء دى كانت متجوزه لا مش متجوزه

أمها مش فاضيه لحاجه غير الكليبات

معرفش ليه أنا مبحبش الخوض فى أعراض حد توفى ولا طبعا حد على قيد الحياه

لكن حد ميت دى بحس أنها تقيله أوى على قلبى

فاللى أنا عايزه أوصله ف النهايه أننا نستنى لحد ما الحقيقه تبان وبلاش نتكلم على أى حد


مشهور أو غير مشهور بأن سبب وفاته

يخص الشرف أو انه لما أتقلت كانت حياته فيها وفيها

الله أعلم أحنا أزاى هنتوفى وياترى لما نموت هنموت موته عاديه وندفن وبعدين خلصت ولا


أيه ممكن يحصل وأيه ممكن يتقال

سيبوا اللى راح عند ربنا لربنا

وبردو سيبوا اللى لسه بردو لربنا احد ما تتضح الحقيقه


ربنا يخرجنا من الدنيا دى على خير لان الناس بقت صعبه أوى

يارب يكون اللى عوزاه وصل

14 comments:

عايش علي الهامش said...

هي دي طبيعة البشر زمان ايام الحرب لما كان اسرائيل بتبعت جاسوس
كانت بتخليه بس يقعد بين الناس والناس بتتكلم ما بين عالم وغير عالم ومؤلف ومبتدع ويطلعوا بلاوي
ايه مش بتقراي ادهم صبري ولا ايه

هما دول البشر ومش هيتغيروا ابدا

شكرا لك

Unknown said...

للأسف القضيتين دول جم ورا بعض كشفوا كتير اوي من مساويء الشارع المصري و حبه الشديد للنميمه و الفضايح و سيرة المشاهير

مافيش اي مراعاه لحرمة الموتي ولا لحزن الاهل

الفقيرة إلى الله أم البنات said...

طبعا لازم نكره الخوض فى أعراض الناس
مش بسهوله كده
دا فى القرآن لازم اربع شهداء راوا باعينهم
كيف لنا قذف الناس هكذا
لو حطينا نفسنا مكان اهلم مش هنقول كلمه واحده
بس الناس فى الدنيا كلها مش مصر بس يا إيمى اللى بتحب النميمه وهتلاقى فى الدول الأجنبيه كمان

على كل حال ياريتنا نسمك لسانها علشان حصاد السنتنا هو اللى هيحدد مصيرنا

وبخصوص البنتين
يا حبيباتى كفايه الموته السوء اللى شافوها
حسبنا الله ونعم الوكيل

Anonymous said...

انا ما بتابعش حوادث وجرايم الفنانين خاصة اللي فيها أعراض زي الفنانة ذكري الله يرحمها و سعاد حسني
بكتفي اني أعرف انهم اتوفوا واقول ربنا يرحمهم

لإنك لو تابعتي هتسمعي مليون إشاعة وأراهنك لو عرفتي الحقيقة
ربنا واحده اللي يعلم

دا غير انك هتكتئبي زي ما بان في سطورك الأخيره
ويتحرق دمك وتسألي نفسك ميت سؤال
ومش هتلاقي إجابتك غير عند الناس اللي رددوا الاشاعات
بس للاسف عمرهم ما قالوا حقيقة واحدة في حياتهم هي دي مهنتهم يثيروا الجدل وكله بأجره دعاية وضجة لمجلة جديدة
مذيعة عايزة تعمل شهرة ومايصدقهاش غير هواة النميمة في البيوت

يعني الطيور علي اشكالها تقع

سيبك انتي من العالم ده
الكدب فيه مالوش اخر


موضوعك حزيييين اوييييييي وأجبرني علي التعليق كالعادة
وعلي إسم مصر تحياتي
ashraf

حزينه said...

مش يبقى اعلام مصر
لو مش عمل كدة
عارفه لو كانت بتحج وماتت هناك مش حيتكلموا كدة

حزينه

shimaagalal said...

عندك فعلا حق ، ولو يعلم الناس أنهم سيكبوا على وجوههم من حصائد ألسنتهم ما فعلوا
ولكن ربنا يهدينا جميعا
ويشرفنى http://hayattimshmsh27.blogspot.com/مرورك بمدونت

3ala asm masr said...

عايش على الهامش
كلمة مش هتغيروا دى بتزعلنى أوى

3ala asm masr said...

emy
عندك حق
هو أحنا أد كده وحشين؟

3ala asm masr said...

الفقيره الى الله أم البنات
مهو لسانا اللى جايبنا ورا أحنا أصلا مبنعرفش نعمل حاجه غير الكلام

3ala asm masr said...

roufi
أنا كمان والله ما بتابع بس هى الحكايه بتيجى لحد عندك من غير أنت ما تروحلها
هى كل الاخبار بقت كده هى اللى بتجيلك

3ala asm masr said...

حزينه
أنتى شايفه ان دى مهمة الاعلام يعنى
لو دى مهمة الاعلام أحنا مش عاوزين لا اعلام ولا ألسن

3ala asm masr said...

shaimaaglal
ربنا يهدينا كلنا يارب
أمين

hasona said...

عندك حق
اذا كان المفروض نحترم خصوصية الاحياء( مع انهم يقدروا يردوا ويدافعو عن أنفسهم )
فمن باب أولي احترام كامل للأموات(لأنهم لا يملكون نفس الحق) وحسابهم ليس بأيدينا

ربنا يجنبنا كل سوء
ويحسن ختامنا

ربنا يوفقك ويكرمك

وعايز أوجه تحية خاصة لك في انتقائك واختيارك لمواضيعك


شكرا لك
وكل سنة وانت بخير

3ala asm masr said...

hasona
عندك حق كفايه أنهم مش قادرين يدافعوا عن نفسهم
ربنا يحسن ختامنا جميعا يارب
شكرا ليك على مرورك وتعليقك اللى أسعدنى