CLICK HERE FOR THOUSANDS OF FREE BLOGGER TEMPLATES »

Monday, March 31, 2008

احنا مش ملايكه ولازم نتغير

بصوا بقى أنا عايزه أتكلم معاكم فى حاجه ومش عايزه حد يفهمنى غلط مش عايزه النوايا اللى مش ولابد تطلع
وكل واحد كرامته تنقح عليه وياخد الكلام على نفسه لانه ساعتها هيبقى على راسه بطحه وبيحسس عليها
ندخل فى الموضوع على طول أنا كلامى هيبقى طالع من القلب ويارب يوصل زى ما أنا عايزه أوصله
كلنا بنشتم فى الدنيا والناس والزمن
والاخلاق اللى أنحطت وكلنا مجروحين وفى ناس كدبت علينا وأتغشينا وأتخدعنا وفى ناس طلعت نص كوم معانا وفى وفى وفى
طيب وأحنا .. أحنا أيه؟ أحنا ملايكه ؟ أحنا مبنكدبش؟ أحنا عمرنا ما عملنا موقف نص كوم مع حد ؟ عمرنا ما عرفنا حد وكلمناه بس عشان لينا طلب عنده؟ عمرنا ما كنا ناس مصلحجيه؟ عمرنا ما رمينا الورق فى الشارع ووسخنا البلد؟ عمرنا ما جبنا لب ومشينا ناكل ونتف؟ عمرنا ما أستغلينا وسطتنا ولو حتى فى طابور العيش عشان ننجز ونخلص المصلحه؟
عملنا كل ده بس أحنا خايفين نشوف نفسنا
يا أما كدبت عشان أخرج من مواقف محرجه اتحطيت فيها
يا اما روحت كلمت ناس عشان مصلحه عايزاها منهم وبعد ةكده محاولتش أرفع سماعة التليفون أسأل عليهم
يا أما مشيت أرمى ورق فى الشارع وأوسخ البلد وكتبت على البنج فى الكليه
وأستغليت وسطتى عشان أجيب نتيجه أو أوصل لدكتور أو أخلص أى مصلحه
وعرفت ناس عشان أخد منهم ورق
وعملت مع ناس مواقف مش ولا بد
أحنا مش بس بنتجرح أحنا بنعمل حاجات تجرح
بس هى لما الحاجه بتيجى فينا كرمتنا بتنقح علينا ونقول لاء أنا عمرى ما أعمل كده
ده فلان طلع اى كلام وفيه وفيه وفيه وأحنا لاء أحنا ملايكه أحنا كويسين احنا بنحب البلد أحنا مبنعملش حاجه غلط
مش عارفه ايه علاقة كل ده ببعضه بس أصلى شايفه الناس بتنتقد وتشجب وتستنكر كل حاجه ومش باصين لنفسهم مش بيدورا على غلطهم يا جماعه يلا نبص جوانا خلى عندنا اربع عيون اتنين نشوف بيهم نفسنا واتنين نشوف بيهم اللى حوالينا
نشتغل على نفسنا ونغير الحاجات الوحشه
أنا بدأت أتغير والله بتغير وبقيت ببص لنفسى قبل ما أنتقد غيرى لو فى موقف عدى أودامى معجبنيش بقيت بفتكر انا عملت ده قبل كده ولا لاء طيب لو مكان اللى عمل كده هتصرف ازاى والله العظيم وبدون اى مثاليه بقيت بجاوب على نفسى
انا مكنتش كده بس بدأت أعمل كده
تحياتى ليكم

Tuesday, March 25, 2008

يلا نساعد


أزيكم ؟ بجد وحشتونى أوى كلكم

عايزه أحكيلكم على حلم فى منكم هيشوفه صغير وفى ناس هتشوفه كبير زى ما أنا شيفاه

أنا طول عمرى بحب أكتب من زمان وأنا صغيره ليا هوايتين الكتابه والحفلات اللى كنت بعملها فى المدرسه وأنا صغيره

لما بدأت أتفرج على برنامج القاهره اليوم والعاشره مساء وغيره وغيره حلمت يبقى عندى برنامج يومى زى الناس دى

برنامج مش هيتكلم فى السياسه والفن والرقص والهز والحوادث والحرايق

لاء برنامج هيتكلم فى أوجاع الناس وتكون فى ناس بترعى البرنامج ده وبتصرف عليه عشان نقدر نقدم مساعدات ماليه لاكبر عدد من الل محتاجينها او نساعد حد فى أنه يحصل على شغل أو صوته يوصل لمسئول أو ... أو ... أو

مش عارفه أيه علاقة ده باللى جايه أتكلم فيه النهارده بس أنا عايزه أقول أن حلمى كله أعمل حاجه مفيده أفيد بيها الناس ومين عارف يمكن أنا كمان أستفيد

كتير مننا عارفين حملة حمايه واللى مhttp://www.amrkhaled.net/ش عارفين حملة حمايه عارفين الاستاذ عمرو خالد

أتفقنا عليه أو أختلفنا لازم نقول أن عمرو خالد عامل حاجه حلوه أوى

أيه هى؟

هى حمله لايقاف المخدرات ومحاربة الادمان

صبرك بس عليا متقولش هو أحنا هنغير الكون ولا تقولى مهى اصل الاسباب كذا وكذا وكذا

أه أحنا نقدر نغير يمكن منغيرش الكون بس على الاقل نحاول او نساعد ونساهم بجزء بسيط فى تغيير المحيط اللى حوالينا

حملة حماقه مش قايمه على الشعارات ولا أن المخدرات حرام واللى يشربها هيتسلق فى النار ولا كل ده

ليه ؟ لان الكلام ده بينفر الناس وممكن يخليهم يزيدوا فيها وميبقوش عايزين يفوقوا ويسمعونا

طيب حلو اوى حملة حمايه عايزانا نوقف المخدرات والادمان

أزاى؟ بأنك تحاول تقرب من حد تعرفه مدمن او بيتعاطى المخدرات وتكلمه براحه خالص ومتحسسوش انه منبوذ والناس كله بتبعد عنه حاول أنت تقرب وتنصحه وتكلمه مش تنصحه بأنه يبطلها بس لانه تنصحه بأنه يلجأ للعلاج لانه لو متعالجش من الادمان هيرجعله تانى بعد فتره طويله أو قصيره

أو أبسط حاجه نعملها أحنا كمدونين أننا نحط الاستيكر بتاع الحمله فى مدونتنا

نكتب لينك الحمله فى مدونتنا

ننزل بوستات والناس بتوع الطب عن مخاطر الادمان

الناس اللى بتجتمع بالاخوه المدونين وبيعملوا أنشطه سوا نحاول نعمل ندوه فى مره عن الادمان ونقول للناس دى احنا بنحبكوا وعايزين نساعدكوا

نحاول نكتب رقم التليفون اللى الحمله عماله عشان المدمنين يتصلوا عليه فى مدونتنا وفى الكومنتنات كمان

يعنى من الاخر فى حاجات كتير اوى

كيان المدونين دلوقتى أصبح كيان مؤثر جدا وماشاء الله صوتنا بقى بيتسمع

وفى مننا ناس بيقت بتنزلهم بوستات فى جرايد كبيره زى الدستور

يبقى نحاول نستغل صوتنا وأمكانيتنا دى فى أننا نحاول نعمل حاجه وأن شاء الله فى أمل

نبعت رسايل بالموبايل لكل الناس اللى عندك عرفهم بالحمله

ولو دى مكلفه ياسيدى أبعت للناس اللى عندك على الايميل عرفهم بالحمله وسبلهم لينك الموقع اللى انا هحطه فى اخر البوست

أبعت رسايل للقنوات الفضائيه بدل ما تعبت من خالو سعيد يهنىء الاسره بالاسكندريه وسلامنا للخاله سعديه وسلم علىىىىى

يعنى ممكن نعمل حاجات كتير بسيطه

نقول لزمايلنا فى الكليه والمدرسه والشغل

اضعف الايمان أعمل بوست زى ده وقول أن فى حاجه أسمها حملة حمايه عشان نوقف الادمان

واللى عايز يعرف أكتر يدخل على موقع الداعيه عمرو خالد


تحياتى ليكم وان شاء الله نقدر نعمل حاجه

Tuesday, March 11, 2008

أنا ليا وسطه فى طابور العيش


سواق التاكسى: هى البلد زحمه كده ليه النهارده فى حركه غريبه كده من الساعه 8 الصبح


واحده راكبه التاكسى معانا : أه أنا واقفه من الصبح مستنيه تاكسى والبلد زحمه أوى


سواق التاكسى : أصلهم هيرخصوا الزيت


أنا : بجد والله فعلا؟ هو الشعب عمل مظاهرات ولا أيه؟


الكل بيضحك عليا طبعا


سواق التاكسى: هو اللى بيغلى بيرجع يرخص تانى؟؟؟


المدام اللى معانا : أنا مهندسه بقالى 8 سنين ومرتبى لا يتعدى ال 800 جنيه وبجيب بيهم كلهم عيش


سواق التاكسى : أنا يا مدام بقالى 7 سنين بشتغل فى الصحه ومرتبى 350 جنيه


المدام وهى بتبصلى وتكلمنى : والله يابنتى بجيب كل يوم ب 3 جنيه عيش على بال ما بلاقى رغيفين حلوين ناكلهم بكون رميت نصه

عملوا عندنا فى المحافظه عيش بيجلنا ال 8 بنص جنيه بس جربته مره لقيته ميتاكلش ده مش عيش ولا كاننا حيوانات



سواق التاكسى : والله يا مدام مره مروح لقيت ست قاعده بعيش بقولها ادينى بجنيه ادتنى كيس خدته ومشيت بفتحه فى البيت لقيت فيه 3 ترغفه بس


وامبارح عديت على مديح اجيب للعيال قرص بقوله ادينى قرصتين وشباكين بديله الاتنين جنيه قالى ايه ده القرصه بخمسه وسبعين قرش والشباك بخمسه وسبعين قرش

وشباك ايه يا مدام تحلفى عليه قبل ما تكليه


المدام : ده انا كنت بجيب علبة سمنه - وقالت اسمها لكن انا مش فكراه - ب 35 جنيه روحت امبارح اشتريها لقيتها ب 53 جنيه يعنى الرقم اتشقلب خلاص

حرام كده والله ده احنا لو قضينا بالمرتب كشرى مش هيكفى

ازازة الزيت يا استاذ بقت ب 10 جنيه ونص


سواق التاكسى : الدكاتره اللى فى بداية حياتهم عندنا بياخدوا 180 جنيه الشاب ده هيعمل اسره وبيت امتى ده على ما يتجوز تكون سنانه اتخلعت


ابن اخويا راح يخطب الناس رفضوه مهو يا مدام معندوش شقه


المدام : الشقه والاكل والعيش بس كله الا طوابير العيش يا استاذ

العيييييييييييييييش الناس هتاكل ايه

العيش يا ناس


المدام بردو وهى بتكلمنى: : انا شيفاكى ساكته يعنى هو انتى مبتاكليش عيش ؟


أنا : لا أنا ليا وسطه فى طابور العيش


شكرا يا أسطى أنا نازله هنا


سلام عليكم


ووقتها بس أدركت قيمة أن واحد قريبك عنده فرن عيش وكل يوم الصبح تروح تصبح عليه ويقولك أتفضل العيش بتاعك أهو

ساعتها بس حسيت قيمة أن واحد قريبنا عنده فرن عيش وعمره ما وقفنى فى الطابور وباخد عيش مش حلو اوى بس الحمد لله بعرف اكله



ودلوقتى همشى فى كل حته وافتخر أنا ليا وسطه فى طابور العيش


العيش با بشر

Monday, March 3, 2008

محتاجه رأيكم


أيوه فعلا أنا محتاجه رأيكم مهو أصل أنتوا اللى عودتونى على كده وفى ناس منكم بتعاملنى على أنى أختها الصغيره وبتدلعنى كمان

يبقى لازم تستحملوا أختكم وتقولولى رأيكم

فى البدايه لولا صاحبة مدونى أنا وصحابى عرضت عليا فكرة أنى أكتب معاهم فى مجله عالنت أسمها على صوتك

ايوه ايوه اللى اللينك بتاعها على اليمين دى

وعجبتنى الفكره وشفت المجله ولقيت ان تقريبا أفكارهم قريبه من أفكارى وكتبت فعلا موضوع من موضوعين كانوا بيدوروا فى دماغى وكنت ناويه أنزلهم فى المدونه عشان أخد رأيكم فيهم ولما لولا قالتلى على موضوع المجله قلت أجرب كده يمكن أعرف أكتب حاجه خصوصا أنى قلت قبل كده أنى بحب أكتب لان مش ديما بلاقى اللى يسمعنى

المهم كتبت أول موضوع وأترفض لانه كان قصير ومع أنى أختلفت معاهم فى حكاية قصير دى الا أنى قلبت الوضع وقلت أحاول تانى مع تانى موضوع واسمه جيل بلا هويه الناس اللى أتعرض عليهم الموضوع كلهم كانوا معجبين بيه أوى وطلبت منى اللى بتاخد مننا المواضيع موضوع عن راشيل كورى لانه ملف العدد وفعلا جهزت الموضوع وبردو عجبهم

أنا بقى عايزه رأيكم أنتوا بدون ى مجاملات

عايزه أعرف أنفع ولا لاء ؟

فى حاجات غلط ممكن تتظبط ولا الامل فيا مفقود تماما؟

أنا مبحبش حد يجاملنى أكيد المواضيع فيها غلطات أنا مش معايا دكتوراه فى الصحافه عشان كده مستنيه رأيكم لانى عارفه أنى هسمع رأيكم بصراحه

المواضيع موجوده فى مجلة على صوتك اللى موجود لينكها على اليمين دى هتلاقوا موضوع أسمه مذكرات راشيل كورى وموضوع تانى أسمه جيل بلا هويه

هستنى رأيكم

أه ملحوظه بقى رفيعه كده على جنب :أبراهيم صاحب مدونة أنا وأنا قالى رأيه موضوع راشيل عجبه لكن هو شايف انه موضوع جيل بلا هويه موضوع تقليدى ومستهلك

فعلا يا أبراهيم يمكن يكون عندك حق بس أنا كان نفسى أوصل أحساسى بأننا فعلا فاقدين للهويه بس أنا شايفه أن معاك حق وأن شاء الله هحاول تانى وتالت عشان مبقاش تقليديه فى أفكارى ومواضيعى


بس خلاص

تحياتى ليكم كلكم