عايزه أتكلم عن حاجه كتير منكم هيشوف أنها مش مهمه خالص
يمكن هى فعلا كده
فى ليله من ذات الليالى وأنا قعده اوادم التليفزيون وبتفرج على برنامج شبابيك لبتاع البت سلملى والبت هبه وأبو دم تقيل الواد اياد
اذ ايه بقى الاقيهم بيتكلموا عن كافيهات البنات
وبيسألوا أيه رأيك فى كافيهات البنات (يعنى كافيه للبنات وبس )؟
وجابوا كافيه تديره ست محجبه وكل اللى أتكلموا تقريب محجبات ومعجبين بالفكره جدا ومستمتعين بوقتهم
مع ان الكافيه بيقدم مشروبات وحاجات عاديه خالص
يعنى مش شيشه ولا حاجات وحشه من دى
الاقيلك بقى ياختى الولاد بيتصلوا واللى يقولك الاختلاط موجود فى اى حته وهى جت على الكافيه
واللى يقول ما يقعدوا فى البيت أحسن
واللى يقول كذا وكذا
طيب وليه يعنى كده
أنا شخصيا مع الفكره جدا وعجبتنى أوى
كافيه كله بنات وأقعد أنا وصحابى البنات براحتنا نتكلم نضحك نزعق نضرب بعض أحنا حرين
أقلع الحجاب أو أفضل لبساه
براحتى بقى مع احنا كلنا بنات
ليه عايزنى أقعد فى البيت وبس
هو انتوا يعنى لما بتروحوا كافيه كلهم صبيان وشيشه وحاجات مقرفه
حد قالكوا اقعدوا فى البيت أحسن
ولا هى الكحكه فى أيد البنات عجبه؟؟؟؟؟
29 comments:
و الله الفكرة حلوة .. لكن نعمل إيه فى مجتمع سيطرت عليه الثقافة الذكورية بشكل شديد
هاتلاقى ناس بتتريق من هنا لبعد بكرة
بجد الفكرة كويسة
ابن حجر العسقلانى
والله عندك حق
مجتمع ذكورى مقرف
ميرسى لزيارتك يا فندم
سيبك
هي القهاوي للرجاله وبس
وبعدين ايه المشكله لما تقعدوا في البيت دي اخلي حاجه في الدنيا قعدة البيت
ولا أيه رأيك
علي العموم هيه فكره تستحق التجربه
ولو نجحت هاتكون تستخق التعميم لانها هاتقلل الاختلاط شويه
علي فكره سلمه بلدياتي من عندنا من بلطيم وأبوها هو النائب بتاعنا في المجلس
اي خدمه
تحياتي يا جميل
الشارد
على فكره الموضوع مش مجرد فكره لانهم فى البرنامج بتاع شبابيك كانوا جابوا واحده صاحبة الكافيه ده وقالت ان الكافيه مش دعوه لعدم الاختلاط لان الاختلاط موجود فى الشارع والشغل والدراسه
لكن هو مكان للبنات وبس وبيتعمل فيه حفلات اعياد ميلاد وحاجات زى كده
وانا مش معاك يعنى مش معقول طول الوقت هنقعد فى البيت
مهو احنا كمان من حقنا نخرج للهوا
وميرسى على زيارتك يا فندم
نورتنى
والله انا شايفه انها فكره جميله جدا
على الاقل نبقى براحتنا زى مانت بتقولى
وبعدين هما مضايقين ليه
هما خايفين مش يلاقوا حد يغلسوا عليه ولا ايه؟
ربنا يهدى
خالص تحياتى
رحيل
ميرسى أوى لزيارتك
بس عايزه أقولك ان الشباب مش هيسيبوا البنات فى حالهم بردو
ولو عملوا كافيه للبنات هتلاقى أودامه أو جمبه كافيه للشباب
وبيغلسوا علينا فى كل حته
فى الشارع
فى المواصلات
فى الجامعه
فى اى مكان
تحياتى يا قمر
أنا كمان مع الفكره دي جداً وشوفت البرنامج واستفذتني الردود
مش بدل مايكون كله مع بعضه وشيشه والكلام ده
مش عارفه الناس دي بتفكر ازاي يعني عاجبهم الكافيهات التانيه والفكره دي مضيقاهم أوي
والله عندك حق
هما المتصلين زعلانين ليه
معندهم الكافيهات المختلطه
حد حاشهم يروحوها
ولا لازم يبقه كله هيصه
...
البنت طالما واخده بالها من نفسها ومبيت راجل
ميتخفش عليها
وان كان الافضل انها تكون في كافيه زي دا عشان الوقتي للاسف صعب تلاقي شاب صايع يلاقي فرصه يتحرش ببنت ومش بيعمل كده
على الاقل باللفظ
ربنا يسترها مع بناتنا ويهديهم ويهدي الشباب كمان
رحاب
ديما منورانى يا قمر يارب
وانا معاكى فعلا عجباهم الافكار التانيه ودى اللى وقفت فى زورهم
ميرسى ليكى يا قمر
mask
ميرسى اول لزيارتك
وفعلا اللى مش عاجبه عنده الاختيارات كتير يروح المكان اللى يعجبه
ولو ان انا بشجع الفكره دى لان زى ما انتى قولتى احنا فى زمن صعب اوى
وربنا يستر علينا
تحياتى يا فندم وليكى زياره
متنسيش اننا فى مجتمع كله حلال للرجال فقط
وياريت تكون فى اماكن زى دى بس مانسينيهاش كافيهات نسميها ملتقى للفتيات الطف متهيالى
تحياتى ليكي ياقمر
ايمان
والله عندك حق احنا فعلا فى مجتمع ذكورى مقرف
المهم الاول نطبق الفكره وبعدين نشوف الاسم
نورتينى يا قمر
همممم
قهوة حريمي
سيبك من الاسم وكافيه للبنات وكده
بس خدي بالك
قدام القهوة دي .. او الكافيه ده .. خدي عندك نوعية المشاريع اللي هتفتح
موقف تكسيات
قهوة بلدي ستايل للرجاله يقعدو عليها عشان يعاكسو البنات اللي هيخرجو
كمية بوتيكات لبس حريمي بالعبيط
انا من رأيي .. الموضوع فيه ترويج لكل الانشطه
انا موافق اننا نعمل قهوة حريمي
وانا هتطوع واشتغل فيها .. قهوجي
سلامووووووووووووز
sooooo
والله العظيم أنا بفتح المدونه وأنا عنيا كلها دموع ومش طايقه نفسى
بس كفايه أقرأ لك تعليق عشان اضحك
أنا معاك فعلا ده اللى هيحصل
بس أنا مكنش قصدى كده أنا بس كنت معترضه أن الشباب تعترض على كافيه للبنات وبس
وعموما أيه رأيك نعمل المشروع ده بالنص؟؟
تحياتى يا أحلى سوووو
هى فكرة حلوة
بس حاسة انها مش هتفرق اوى معانا المحجبين العاديين يعنى
انا عن نفسي مش هتفرق معايا اوى كافيه بناتى ولا مختلط انا فى الحالتيينقاعدة مع اصحابي وماليش دعوة باللى حواليا
بس انا شايفة ان الفكرة ممتازة للمنتقبات
لانهم للاسف مش بيعرفوا يدخلوا مطاعم وكافيهات علشان النقا وكده
وصاحبتى اما بخرج معاها هى منقبة يعنى لازم نشرب حاجة نفسي اكل معاها قبل مااموت
انا جيت اهوه معلش انا مش بدخل كتير عالنت
وانتى عارفة انى ماليش فى الشعر بس مدام موضوع عام هتلاقينى علطول
سلام ياجميل
اولا انا حعنزر للتاخر انى اجى هنا واعلق بس والله كنت كل ما اجى معرفش ادخل
بالنسبه لموضوع الكافيه انا مع الفكره قلبا وقالبا لانى بعد ما ذادت نسبه التحرش بالبنات والمعاكسات البنات او نسبه كبيره منها بتخاف تنزل الشارع بسبب المعاكسات او التحرش
وخلافه
بس انتى مش معايه انها لو اتعممت حتكون خطوه للخلف لو زاد الموضوع ده حيبقى فى مناطق للبنات ومناطق للشباب وده غلط بدل ما تتعمل الاماكن دى المفروض انى الطرفين وخصوصا الولاد يحترموا خصوصيه بعض
بس لحد ما ده يحصل انا عازركم ومقدر ترحيبكم بالفكره
ياسمين
اخيرا يا قمر نورتينى
بصى هو فى كل الحالات هنلاقى الفكره كويسه وهيبقى فى ده وده وانتى تختارى
وزى ما انتى بتقولى هتبقى فكره حلوه للمنتقبات وفى محجبات كتير بيبقى نفسها تقعد مع صحابها من غير حجاب اهو تبقى فرصه بردو فى نهايه هو هيبقى اختيار من ضمن الاختيارات
نورتى يا قمر
رئيس جمهورية نفسه
والله هى هتبقى فرصه نبعد عن المعاكسات شويه والتحرش زى ما انت بتقول
وانا بختلف معاك هى مش هتبقى خطوه للخلف ولا حاجه
بالعكس هيبقى اودامك اختيارات كتير
انك تروح كافيه فيه ولاد او بنات او الاتنين سوا
وانت تختار بقى
ميرسى على تشريفك ليا بالزياره
تصدقى فكرة جميلة وطلعت فى دماغى انفذها وانا بقرا البوست بتاعك
وابقى خلى كدا ولد يهوب ناحية الكافيه بتاعى
بالنسبة للولاد اللى مش عاجبهم
فده يا اوختى الحقد بعيد عنك
بس معلشى احنا البنات قدها ونص كمان
تحياتى يا جميله
desert cat
هو فعلا حقد
وانا معاكى فى المشروع وهنجيب البنات البلوجريه ونقف اودام الكافيه واللى يهوب نقطعلك رجله
تحياتى يا قمر
اولا اياد مش خنقه
هيه دماغه كبيره بس
او غريبه
بس هو محترم جداااا
مش احسن من التنك التاني عمرو
لامهم بالنسبه للكافيه هو فعلا فكره مشكله
بس لازم تلاقي رفض
عارفا ليه
لانها غريبه وجديده
بس انما هيه فكره حلوه
وطبعا لازم تلاقي رفض من الولاد
يعني لو كل البنات راحت كافيهات زي كده
او بقت كتير ومتوفره للبنات
الولاد هاتشد في شعرهم
طبعاااااا
احنا ما نعرفش نستغني عنكم
انتوا روووح الحيااااه
انتوا انتوا انتوا
البنات
حواديت وحكاوى
بصرف النظر عن رايك فى عمرو
الا انى بشكرك على تشريفك المدونه
وياريت تقدروا قيمتنا وبلاش الشباب يرخموا عالبنات
عااااااااا
انا زعلان عشان فاتتنى حلقات قصدى بوستات
بس البوست ده جامد اوى اوى
وهى فكرة حلوة واظن انها شبيهه بالافراح الاسلامية اللى مش بيختلط بيها الرجالة بالستات
بس المشكلة بقى لما تقلعى الجحاب تضمنى ان ما حدش راجل يعنى يدخل عليكو
كمان المشكلة ان مش شرط يبقى زوار الكافية ده من البنات المحترمات بس لأ هتبصى تلاقى نوعية معينة من البنات اللى بتمارس انشطة غير مشروعة .. حلوة انشطة غير مشروعة دى ؟ .. هتبصى تلاقيهم جايين ويستخبو فى الكافية ده
بس عجبنى اوى اوى انك اختارتى صورة القهوة القديمة دى هنا
بجد بوست رائع اوى اوى اوى
تحياتى
أحمد الصباغ
والله يا فندم فى الكافيه بتاعى هنحط ضوابط وشروط -حلوه ضوابط دى جامده -
لنضمن السلامه لكل اهل الكافيه الكرام
وأى بنت تدخل تستخبى عندنا هنجيبها من شعرها
اه هى مش فوضى هنا
تحياتى يا أبو حميد
فكرة حلوة جدا
ده انا كان نفسى فى حاجة زى دى من زمان
يارب حد يعملها فى اكتوبر عندنا
بنت خيخه واى كلام
بقالى فتره مستنيه زيارتك يا قمر
متقلقيش انا ممكن انفذ الفكره دى انا وانتى بالنص
ايه رايك؟
تحياتى
اااااااه انا كمان سمعت الحلقه دى
والواد اياد كان مع الولاد .. ويقلهم مش كده
وواد مستفز اتصل ويقلهم مين هيطرى القعده
انا كمان مع الفكره جدا
واللى متنفذ عندنا منها حاجه شبيه ليها
وهى سيبر بنات للبنات فقط تحت قيادة بنات
عؤبال الكافيهات دى كمان لما توصلنى هنا
تحياتى
السلام عليكم
طبعا الفكرةةةةةة روووووووووووووووعه
و جميلة جدا
و بتدي حرية للبنت في اطار محترم
حتي لو بنات مش كويسة داخله
اخرهم هيعملوا ايه
يشربوا ساقع و يمشوا
:D
بجد فكرة جميلة
و نفسي تتنفذ في كل محافظة و بلد
تسلمي يا جميل علي موضوعاتك المهمة
تحياتي و حبي
:)
د/أجدع بنوته
يارب توصل عندنا احنا كمان
والقادم أجمل
والله أنا بفكر أعمل المشروع ده
يا مسهل
Post a Comment