من يومين كده كنت بقلب فى قنوات التليفزيون وتوقفت عند قناة دريم وتابعت برنامج شبابيك
اللى بيقدموه الشباب دول سلمى واياد وهبه اكيد انتوا عارفينه
المهم انا طبعا متابعتش الحلقه من اولها
لكن شوفت حته كده كان بيتكلم فيها الاخ اللى كانوا مستضيفينه عن انك انت اللى بتحدد مودك
يعنى انت اللى بتحدد حالتك النفسيه تبقى زعلان ومكشر ولا تبقى فرحان وبتضحك
وقال ان انت لو عندك استعداد للزعل والتكشير يبقى هتكشر مهما الناس عملوا معاك
لكن لو عاوز تفك وتفرح وتنسى هتنسى حتى لو كنت لوحدك
وقال مثلا ان الولد اللى سابته حبيبته ممكن وهو ماشى بالعربيه يشغل كله اتكسر كله اتدمر لانه عايز يزعل ويفتكر ويشيل الهم
وممكن يشغل النهارده فرحى يا جدعان ويهيص ويضحك ويندمج مع الناس ويخرج من المود اللى هو فيه بردو لو هو عايز
يعنى انت اللى بتسيطر على مودك مش مودك اللى بيسيطر عليك
وانا عايزه اقولكم ان انا جربت كده فعلا فى نفس اليوم اللى شوفت فيه الحلقه دى
كنت مضايقه كده شويه وبعد ما شوفت الحلقه دى قمت خدت شاور وعملت نسكافيه وعملت كوكتيل اغانى حلو وقعدت اسمعه بروقان وطبعا اتفسحت فى المدونات لان مدونتى الكحيانه دى محدش بيدخلها خالص
المهم بعد كل ده بقيت مبسوطه واتكلمت مع الشخص اللى كنت زعلانه منه عادى وتعاتبنا عتاب حلو انتهى الموضوع على كده
وجربت ده بعدها كام مره كده وفعلا لقيت ان انت اللى بتسيطر على مودك
وفى النهايه عايزه اقولكم ربنا يبعد عننا اى حاجه وحشه واى زعل
Tuesday, September 4, 2007
أتحدى مودك
Posted by 3ala asm masr at 6:47 AM
Subscribe to:
Post Comments (Atom)
5 comments:
يعنى مثلا انا لما بكتئب ببقى نفسى اكون مكتئبة
سعات والله :D
بس ايه يا بت يا هند الجمدان دة
يعنى شاور ونسكافيه وكمان اغانى اكيد فريوز ومنير
من غيرى يا وحشه
حسابك معايا وتحكيلى حصل ايه مضايقك :)
مقدرش يا حبيبى والله اعمل حاجه من غيرك وانتى عارفه
انتى وحشانى اوى والله العظيم
ومتخافيش طبعا هحكيلك كل حاجه
منوره البلوج الكحيان يا قمر
ازيك يا هند ( مش هند برضه ؟) .. بصى أنا سمعت كتير عن حكاية اتحدى مودك و لكنها للأسف دايما بتيجى معايا بفضل ... تفتكرى من كتر ما احترفت الاكتئاب بابقى عايزة امسك فيه و حكاية اتحدى مودك بتبقى تمثيلية باعملها قدام نفسى تأدية واجب ؟ .. و الله مش بعيد على شخصية سايكو زيى .. و مدونتك مش كحيانة و لا حاجة بس ربنا يعينكوا فى الثانوية العامة .. الحمد لله إنى خلصتها من زمان
سايكو
انا مش عارفه اسمك عشان كده كتبت سايكو
بصى ياستى انا جربت فعلا اتحدى مودى وحصل
وعشان كده بقولك جربى
وجربى اكتر من مره يمكن فى مره تقدرى فعلا تتحدى مودك
وربنا يبعد عنك اى حاجه وحشه
وعلى فكره انا مش فى ثانوى
انا فى 3 كلية اداب انجلش
Post a Comment