بصوا بقى أنا عايزه أتكلم معاكم فى حاجه ومش عايزه حد يفهمنى غلط مش عايزه النوايا اللى مش ولابد تطلع
وكل واحد كرامته تنقح عليه وياخد الكلام على نفسه لانه ساعتها هيبقى على راسه بطحه وبيحسس عليها
ندخل فى الموضوع على طول أنا كلامى هيبقى طالع من القلب ويارب يوصل زى ما أنا عايزه أوصله
كلنا بنشتم فى الدنيا والناس والزمن
والاخلاق اللى أنحطت وكلنا مجروحين وفى ناس كدبت علينا وأتغشينا وأتخدعنا وفى ناس طلعت نص كوم معانا وفى وفى وفى
طيب وأحنا .. أحنا أيه؟ أحنا ملايكه ؟ أحنا مبنكدبش؟ أحنا عمرنا ما عملنا موقف نص كوم مع حد ؟ عمرنا ما عرفنا حد وكلمناه بس عشان لينا طلب عنده؟ عمرنا ما كنا ناس مصلحجيه؟ عمرنا ما رمينا الورق فى الشارع ووسخنا البلد؟ عمرنا ما جبنا لب ومشينا ناكل ونتف؟ عمرنا ما أستغلينا وسطتنا ولو حتى فى طابور العيش عشان ننجز ونخلص المصلحه؟
عملنا كل ده بس أحنا خايفين نشوف نفسنا
يا أما كدبت عشان أخرج من مواقف محرجه اتحطيت فيها
يا اما روحت كلمت ناس عشان مصلحه عايزاها منهم وبعد ةكده محاولتش أرفع سماعة التليفون أسأل عليهم
يا أما مشيت أرمى ورق فى الشارع وأوسخ البلد وكتبت على البنج فى الكليه
وأستغليت وسطتى عشان أجيب نتيجه أو أوصل لدكتور أو أخلص أى مصلحه
وعرفت ناس عشان أخد منهم ورق
وعملت مع ناس مواقف مش ولا بد
أحنا مش بس بنتجرح أحنا بنعمل حاجات تجرح
بس هى لما الحاجه بتيجى فينا كرمتنا بتنقح علينا ونقول لاء أنا عمرى ما أعمل كده
ده فلان طلع اى كلام وفيه وفيه وفيه وأحنا لاء أحنا ملايكه أحنا كويسين احنا بنحب البلد أحنا مبنعملش حاجه غلط
مش عارفه ايه علاقة كل ده ببعضه بس أصلى شايفه الناس بتنتقد وتشجب وتستنكر كل حاجه ومش باصين لنفسهم مش بيدورا على غلطهم يا جماعه يلا نبص جوانا خلى عندنا اربع عيون اتنين نشوف بيهم نفسنا واتنين نشوف بيهم اللى حوالينا
نشتغل على نفسنا ونغير الحاجات الوحشه
أنا بدأت أتغير والله بتغير وبقيت ببص لنفسى قبل ما أنتقد غيرى لو فى موقف عدى أودامى معجبنيش بقيت بفتكر انا عملت ده قبل كده ولا لاء طيب لو مكان اللى عمل كده هتصرف ازاى والله العظيم وبدون اى مثاليه بقيت بجاوب على نفسى
انا مكنتش كده بس بدأت أعمل كده
تحياتى ليكم
Monday, March 31, 2008
احنا مش ملايكه ولازم نتغير
Posted by 3ala asm masr at 11:16 AM
Subscribe to:
Post Comments (Atom)
27 comments:
ا خلى عندنا اربع عيون اتنين نشوف بيهم نفسنا واتنين نشوف بيهم اللى حوالينا
عندك حق والله ..ده حتى لو بعين واحدة ممكن نشوف نفسنا بجد من غير مثاليات
لكن فعلا لازم نتغير ..
تحياتي
والله كلامك مظبوط بس
انا عاوز اقولك حاجة ان احنا اللي بنحط نفسنا في المواقف دي كل واحد مننا يقدر يغير عيوبة لو هو عايز بس احنا اللي مش راضيين لان احنا عاجبنا نفسنا علي كده
والانسان اللي من غير عيوب يبقي ملام وففيش ملايكة علي الارض دلوقتي
تحياتي ليكي
وانا كمان زيك يا هند
بشوف عيوبى انا قبل ما اشوف عيوب الناس
وبحاول امنع نفسى من الخطاء
وده كان صعب
ولكن مع التعود
ابتديت اجد اخطائى اقل بكثير
لا اقول انعدمت ولكن قلت بدرجه كبيره
ادعوا من الله ان تنعدم
تصدقي انك بنت مجدع والله
فعلا والله كلنا عيوب وحالتنا مرار
ولازم بجد نتغير
الا قوليلي .. هو انتي اتغيرتي ازاي او عملتي ايه
عشان انا مش عارف او عارف بس مش فاهم او فاهم بس باستعبط
سلاموووووووووووووووووووووز
والله كلنا فينا عيوب
وانا زيك بعدلها وبصلحها
وعلشان كده بكتبها للناس
unique
والله انتى صح لو بعين واحده ممكن نشوف نفسنا بس ده لو احنا عايزين
اه والله ياهنوداا
يسلم فومك يابتتتتت
وفيتى وكفيتى
لو كل حد فعلا قبل مايقول تصرف غيره كخه
يبص ع تصرفه
قبل مايشتم ف اخلاق غيره
يدعبس ف نفسه
بنسبة 70% هيلاقى فيه الصفه اللى مكنتش عجباه ف غيره دى
برافو ياهنوداا
واتمنالك تغييير موفق
فعلا لا يغير الله ما بقوم حتى يغيروا ما بانفسهم
فعلا لو كل واحد بدا بنفسه اكيد الحياه هتبقى احلى
تحياتى ولاء
شاب نفسه يحقق نفسه
معاك حق فى كل كلمه
احنا اللى عجبنا نفسنا كده
فرنسا هانم
الاول وحشتينى اوى والله
تانى حاجه فعلا هى عمر الاخطاء ما هتتمحى بس هتقل او على الاقل هنتعلم منها
sooooo
ههههههههه
ربنا يكرم ده انت اللى ابو الجدعان والله
انا اتغيرت عشان عايزه ابقى احسن دى كل الحكايه
appy
فعلا انتى حد رائع يا ابى انا بجد بتعلم من اللى بتكتبيه
صانعة الحريه
انتى كمان بجد لما شفتك ارتحت وشك بشوش ماشاء الله وبنت مجدع بجد
وبالنسبه للموضوع مفيش رد بعد ردك
د/ اجدع بنوته
يسلم فومك انتى يا سمسه
ياريت نبص لنفسنا
walaa
مفيش كلام بعد كلام ربنا
لازم نبدا بنفسنا
بصى ياهند المصرى معروف ان الكسل بالنسباله هى الطبيعة الى ايش فيها
مع انه لو استخدم نص الطاقة الى ربنا عطهاله ممكن يخلى البلد دى
مافيش بعد كدة
بس احنا كدة كلنا طبعنا كدة
بنبص على الحاجة وممكن نشوف الغلط الى محدش شايفه
وبيبقى عندنا الامكانية اننا نغيرها
بس بنفضل باصين للحاجة كدة
ومستنين الفرج
يمكن ربنا يبعتلنا واحد هندى
يصلح مكانا ولا حتى واحد صينى
هو اه ممكن ينكسر
بس الهم انه يبقى حد مكانا
احنا اخرنا نروح الشغل نعد نتكلم ونم ونيجى فى اخر الشهر نقبض كفاية اوى كدة
دةحتى يبقى كدة رضا من ربنا
دة كفاية اننا بنروح نقبض
طي يارتهم يبتلونا القبض على البيت
اهو بدل ما الواحد يروح الشغل ويقرف نفسه
او
مثلا واحد شغال نجار مثلا يعنى
وبيعمل كرسى لحماته
مثلا يعنى
والولا بغبائه قام داقق مسمارين
بس مدقهمش اوى يعنى
وكان فيه واحد جنبه تقدرى تقولى الصبى بتاعه بلية يعنى
شايف المسمارين
بس واقف صنم قدامه
ومش عايز يتحرك ولا يدقهم او حتى يقول للاخ الى جنيه يعدلهم
بس يقولك لا وانا مالى لما يبقى يشوفهم هو يبقى يعملهم
يعم طب قوله يعملهم مهو اكيد مش شايفهم
وكمان يعم اعمل خدمة فى حماته الغلبانة
بدل متيجى تعد على الكرسى تعد على المسامير
حيبقى شكلهاوحش اوى
بس تقولى ايه مهو مصرى
يعنى المنخار طالع لفوق
ولا كأنه ملك الروم
وواحد تانى ماشى فى الشارع وبياكل
محشى ورق عنب
ومع ان جنبه صندوق زبالة
لكن بسعته حب يرمى العنب بعد ما اكل الورق بتاعه جنب البتاعة
ولما تجيى تسئليه ليه
يقولك لما يجيى الزبال يبقى يشلها
يعم الكتكوت ما البتاع بتاع الزبالة
محطوط جنبك رجلك يعنى مد ايدك وارمى
ولا خلاص لو رميت البتاع فى البتاعه شرفك حيضيع
وكمان افرض الراجل بتاع الزبالة مات او توفى او حصلته حدثة وتقتل
تعمل ايه ساعتها حتشوفلك مكان تانى ترمى فيه
بصى ياهند من الاخر
البلد دى مش حتتغير ومش حنبقى احسن
غير لما ل واحد غير من نفسه بجد
وحب انه يدى البلد دى
وميستناش انها تديله
لا يبدء هو الاول انه يديها ويبنيها ويرجعها مصر ام الدنيا تانى
بس طول محنا عايشين ومستنين
ان حد تانى يجيى يعملنا الى المفروض احنا نعمله
يبقى قولى علينا وعلى البلد يارحمن يارحيم
بجد الله ينور عليكى
وعلى كلامك
انتى عارفة ان ناس كتير ممكن تدخل تكتب الى انتى قولتيه
بس مش كتير بيعمل بكلامه
وبرده مش كتير الى كلامه بيبقى طالع من قلبه
قليل اوى
بس ربنا يزيدهم
ويكتر من امثالك
تحياتى ياهند
الله ينور عليكى ياهنود
والله كتير بيدور جوايا نفس الحوار ده
وبقول نفس الكلام ياترى انا لو مكان الشخص ده هعمل ايه؟
فعلا لو سالنا نفسنا السؤال ده
هنرتاح ومش هنغلط فى حد
واكيد اكيد هنعذر بعض
تحياتى ليكى ع البوست الجميل ده
وربنا يقوينا ونغير نفسنا دايما للافضل
وفقنا الله واياك لما يحب ويرضى
بصي
مفيش حد علي وجه الارض مثالي
المثاليه هي حلم الفلاسفه والادباء
أكيد كل حد مننا عنده عيوب
وأكيد كل واحد ليه مميزات
والمفروض نحاول نحسن نفسنا
عموما
تدوينه متميزه
تحياتي
زعيم كمورا مورا
مهو عشان هى مش هتتغير غير لما احنا نتغير نقول تعالوا كل واحد يبدا بنفسه بلاش عشان البلد عشان نحس اننا احسن من جوانا عشان منبقاش منافقين بنافق نفسنا ونقول لاء احنا كويسين واحنا اساسا فينا العبر
اخر العنقود
ربنا يوفقنا كلنا للى فيه الخير يارب
الشارد
هو فعلا مفيش حد مثالى واحنا مش بندور على المثاليه احنا بنشوف ازاى ممكن نكون احسن
انتى معاكى حق على فكره بس المشكله انى احنا مش عايزين نقف مع نفسنا ونحاسب ونراجع ونصحح ولو عملنا ده مبيكونش بالصوره الصح ول اتعمل بالصوره الصح بنرجع تانى ونقول الف مبرر ومبرر لينا علشان نكرر الغلط
تحياتى محمود
اظن طبعا انا معترفة من الاول خالص
ان انا بت خيخة وأى كلام
يعنى اكيد طبعا عملت الحاجات اللى انتى قايلة عليها
او على الاقل عملت حاجات منهم
وفعلا معاكى حق
ان احنا قبل ما نشوف عيوب غيرنا نشوف عيوبنا الاول
تحياتى ليكى
اختك خيخة
لا بوست حلو جدا جدا
وبجد صحيتى جوايا الانتباه لنفسى
خاصة فى جزئية اننا بتهم الناس بالكدب او بجرحنا او او
واحنا يعنى اللى ملايكة وعمرنا ماكدبنا ولا جرحنا حد مثلا ؟؟
واحنا يعنى اللى عمرنا ماستعملنا واسطة او صاحبنا حد مصلحة ؟؟
بصراحة فعلا محتاجين نقف نفسنا وقفة كدة نراجع فيها مبادئنا اللى طووول النهار ننادى بيها
تحياتى
شيماء
رئيس جمهورية نفسه
يارب نعملها بالطريقه الصح
بت خيخه واى كلام
ياريت كل الناس زيك يا أم شريف أنتى ديما بتعترفى وبتصححى
شقاوة شعب
شيماء طمنتينى ان رسالتى وصلت وده اللى أنا أنا كنت عايزاها اصحكيم واصحى نفسى قبلكم
Post a Comment