تاج جالنا من الاخت العزيزه عليا أنا شخصيا رحاب مصطفى صاحبة مدونة
myvoice
-أسم مدونتك
فى عالم من الشجن
لماذ أخترته وماهى نيتك من وراء أختياره؟
لانى حاسه أنى عايشه فعلا فى عالم من الشجن
هل فكرت فى أغلاق مدونتك؟والسبب؟
نعم - لانى حسيت انها معملتش الاثر اللى كنت عايزاه بين المدونات
صورتك فى المدونه ورمزيتها؟
صورة طفله فى فى عنيها شوية حزن-يمكن من شوية الحزن اللى جوايا
لماذا دخلت عالم التدوين؟
دخلت عالم التدوين لشوية أسباب
أولها أنى بحب الكتابه وعندى حلم يبقالى مكان فيها
ولانى بجد نفسى أقدر أغير حاجه فى حياتنا من خلال شوية الافكار الغلبانه والكحيانه اللى بقولها فى المدونه ويارب أكون بعرف أوصل اللى عايزه أقوله
وعشان أقول كمان اللى بحس بيه لانى مش ديما بلاقى حد يسمعنى
جمله قيلت لك فى وصف مدونتك؟
مفتكرش أن حد وصفلى مدونتى أحنا عندنا ناس بتدخل فى الموضوع على طول هههههه
التعليقات بالنسبالك أهميتها؟
مهمه جدا أكتر مما تتصوروا لانها بتعرفنى تفكيرى رايح فى أى أتجاه
أحلى بوست كتبته ضع اللينك ثم أذكر لماذا؟
طبعا مش محتاجه القولكم أن كل بوستاتى حلوه وفوق الفظيعه
لاء بس بجد أحلى بوست كان نفسى اعيش براحتى عشان أنا بجد نفسى أعيش براحتى
أفضل مدونه قريتها؟
كتير مدونة أحمد الصباغ -خالوا أحمد
نوران الشاملى - بنت خيخه واى كلام
فرنسا هانم
د/أجدع بنوته
سووو- عجوز وعنده 30 سنه
رحاب مصطفى -myvoice
تراقيع نداااااااا
وكل الينكات اللى على جمب دى
حد قل أدبه فى التعليق وأيه رد فعلك؟
لحد دلوقتى لاء الحمد لله ولو حصل همسح التعليق وياريت الناس متفهمش أن معنى كده أنى مش هسمح لحد أنه يختلف معايا لاء طبعا مش كده
بس فى فرق بين الاختلاف فى الرأى وقلة الادب
أسوأ بوست وأسوأ مدون؟
مين أنا عشان أحكم على المدونات والبوستات ده انا غلباااااااااااااااااااااااااااان
هيحصل لايه لايميلك لما تموت؟
ايميلى محدش هيفتحه أكيد لكن مدونتى فى حد قريب منى اوى هوصيه يفتحها ويخليكم تدعولى وتقرولى الفاتحه أن شاء الله
أديت الباسورد لحد قبل كده؟
أه ولسه معاه وهيفضل معاه
أسمك؟
هند عمار
المشهور بيه وسط أصحابك ؟
نودا
شخصيتك نوعها أيه؟
مش عارفه ياريت حد يقدر يحللهالى وهنيالك يافاعل الخير والثواب
السفر بالنسبالك؟
سبع فوايد
وقت فراغك بتعمل فيه أيه؟
مش ديما على حسب
التليفزيون أو النت أو اخرج
المود بتاعك ؟
متقلب يعنى شويه فرحانه وشويه زعلانه بس بحاول ديما أضحك
سمعت أن الضحك بيطول العمر ههههههه
الاكله المفضله؟
كشررررررررى
صفات أخدتها من بابا؟
معرفش لانى مشوفتش بابا الله يرحمه-توفى وأنا عمرى 6 شهور
صفات أخدتها من ماما؟
الطيبه- بصدق أى حاجه بسرعه- بثق فى الناس بسرعه-حظى قليل
مجال دراستى؟
أداب أنجلش
أكتر ست حاجات بكرهم؟
الكدب- الظلم - الغدر - أنك تعرف حد بس عشان مصلحه - الخيانه- الذل
أكتر ست حاجات بحبهم ؟
الصراحه- الحب اللى بجد - الصداقه اللى بجد - كل حاجه بتطلع من القلب بجد
امرر التاج لمين؟
لكل الناس فى اللى جمب دول
Monday, January 21, 2008
تااااااااااااااج
Saturday, January 19, 2008
Thursday, January 17, 2008
جاءنا البيان التالى
صرح مصدر مسؤول بكلية الاداب جامعة طنطا بأنقضاء فترة الامتحانات للفرقه التالته قسم اللغه الانجليزيه
هذا وقد أضاف المصدر عن أصابة الطلاب بحاله من الاكتئاب نظرا لصعوبة الامتحانات وربنا يستر وننجح
كمان أضاف بأصابة الطالبه هند -اللى هو أنا يعنى - بدور برد رهيب ياعينى مما جعلها تختفى لمدة يومين بحالهم
وربنا يسامحكم كده محدش يسأل عليا ياريت اللى يجيى يجيب معاه برتقال او لمون يعنى اللى تجبوه ويبقى كتر خيركم
ومن موقعى هذا أحب أطمن الاخت لولا صاحبة مدونة أنا وصحابى وأحلى الاوقات أننى لم يصينى أى مكروه فى الحريق الذى شب بالكليه
لان الحريق كان فى حقوق وأنا فى أداب وبعدين انا مبمتحنش فى خيم بمتحن فى مدرجات
وبعدين يا لولا أنا مكنتش هناك يوميها أصلا أنتى كنتى عايزانى أروح فيها ولا ايه اه منك أه
كانت معكم هند _ على أسم مصر -من امام مدرج 5
كلية الاداب جامعه طنطا
Tuesday, January 8, 2008
لازم نكون سوا
كثيرا ما نختلف على عمرو خالد
ولكننا دائما نتفق على أنه الداعيه الاسلامى الاقرب الى قلوب الشباب وأنا منهم
محستش بالدهشه قد ما حسيت بالفرحه لما شفت الداعيه عمرو خالد داخل الكنيسه الكاتدرائيه فى الاحتفالات بعيد الميلاد
وليه لاء يا جماعه؟
وليه ما ندوبش جبل التلج اللى بينا ده ونقول أحنا لازم نكون سوا
لاننا بجد لازم نكون سوا
أى خلاف بينا مش هنستفاد منه شىء غير الفتنه والمشاكل والانقسام داخل مصر
والمستفيد فى الاخر الخارج
مدام كلنا بنحب البلد دى يبقى ليه لاء وفى الاخر لهم دينهم ولنا دين
عمرو خالد صرح لعمرو أديب فى برنامج القاهره اليوم أنه ذهب للبابا شنوده يعرض عليه العمل المشترك بين شباب المسلمين والشباب المسيحى ضد المخدرات التى لا تفرق بين دين وأخر ولكنه أبتلاء لجميع شبابنا
وده اللى فرحنى أوى أحنا لازم نكون مع بعض
ياريت كل أم وكل أب بلاش نعلم ولادنا يفرقوا بين زميلهم المسلم وزميلهم المسيحى لاننا فى الاخر ولاد البلد دى
مصر مليانه مشاكل بلاش كمان يبقى فى بينا وبين بعض مشاكل وأنقسام وفتنه
خلى البلد دى تقف على رجليها بقى
أحنا لازم نكون سوا
Sunday, December 30, 2007
أعذرونا
أنا بعتذر لكل الناس اللى بتيجى عندى المدونه وأنا للاسف مش قادره أزور مدوناتهم
ومعلش ده لظروف الامتحانات وأدعولنا
شكرا لكل اللى زارونى وأنا للاسف متابعتهمش
بنت خيخه واى كلام
فرنسا هانم
أحمد الصباغ
والقادم أجمل
شقاوة شعب
ابن الحجر العسقلانى
سووووووووو
د/أجدع بنوته
بيبو
زعيم كمورا مورا
رئيس جمهورية نفسى
الاستاذ
رحاب مصطفى
ويارب تدعولنا نعدى الامتحانات دى على خير
Saturday, December 15, 2007
هزى يا نواعم
مسابقة الرقص العالميه لاختيار أفضل راقصه للرقص الشرقى
الله عليك وعلى جمالك
أيه ده بس أدى المسابقات ولا بلاش
هو أحنا ناقصين راقصات
ما كفايه اللى بنشوفه كل يوم فى الفيديو كليب
هو فى واحده دلوقتى بتطلع تغنى كله طالع يهز
وعلى فكره مش أنا اللى بقول تهز هما اللى بيقولوا
دطبعا عايزين تعرفوا هما مين؟
اللى عملوا البرنامج الفظيع ده
بما أن الجنس الناعم ناعم والجنس الخشن خشن على رأى سمير صبرى سموا البرنامج
هزى يا نواعم
دعوه صريحه لكل البنات اللى عندهم طاقه مكبوته عشان يهزوا
مهو الكبت وحش بردوا يا أخوانا
فجت مجموعه بقى من المتخصصين فى الهز عشان يحلوا البنات تهز
خدوا عندكم
الراقصه المعتزله نجوى فؤاد
المخرج سيمون أسمر
مدرب الرقص المصرى اللى مشرفنا ورافع أسم مصر عاليا ظاظا
مدربة الرقص نادره عساف
واخيرا ايليا زيدان
يقدم البرنامج الممثا يوسف الخال
على أنفام الفرقه الموسيقيه بقيادة ايلى العليا
وسمعنى يابنى سلام صعبت عليا نفسى
-تحيا الوحده العربيه -
طبعا كل العرب اخوات اخوات
وعشان أحنا بنحب الوحده العربيه جمعنا كل البنات من سوريا ولبنان والمغرب وتونس ومصر والخ
عشان أيه؟
عشان يهزوا .....أيوه كده شطار
هنلاقى بقى معانا ... ساندرا من سوريا
ماريا من لبنان
سهام من المغرب
وطبعا العالم بقى قرية صغيره
جبنا اخواتنا الاجانب يهزوا شويه
هنلاقى معانا ماليكا من روسيا
ليلى من اوكرانيا
ملحوظه رفيعه بقى
الحلقه اللى أتفرجت عليها كان فى واحده مش فاكره أسمها الست نجوى فؤاد قالت فى حقها كلمتين زى الفل الخلاصه منهم أنها بترقص كويس
طبعا البنت كانت فرحانه جدا وشوفوا بقى الكلمتين اللى قالتهم
هى كانت تونسيه
قالت أنها جت عشان تهز أسم بلدها ....قصدى عشان ترفع أسم بلدها عاليا
وبتشكر الست الوالده عشان هى اللى علمتها تشطح بالعصا ....يعنى ترقص بالعصايه
والله كتر خيرها الست الوالده
وانا من موقعى هذا أحب أعقم على نقطتين
يا حلوين يا قطاقيط أنتوا مش محتاجين تعملوا مسابقه عشان تهزوا ...سورى قصدى ترقصوا
عندكم الفيديو كليب طول النهار والليل
والكبريهات مفتوحه على مصرعيها روحوا هزوا فيها
وأنا مستنيه رأيكم فى الهز ..زقصدى فى البوست
سلاموز
بجد وقفت فتره قبل ما أكتب البوست ده مش عارفه أبدأ البوست ده أزاى
كنت بقلب فى القنوات ولقيت نفسى وقفت عند قناة ال بى سى
منتظره أشوف فيلم أو مسلسل أو أى شىء من هذا القبيل
مكنش فى ولا فيلم ولا مسلسل ولا حتى حلقة كرتون
كان فى صدمه
Monday, December 3, 2007
عادى جدا انى أبقى بزاكر وأحب أريح شويه وبما انى بعشق عمرو أديب وأسلوبه فقرر انى أخد ريست وانا بتابع البرنامج بتاعه
وعادى بردو أنه يحكى عن اخر سفريه اللى المفروض كان مسافرها فى شغل
وعادى بردو أنه يقولنا أخبار الدنيا
لكن اللى مش عادى بالمره أنى أبقى بتفرج كده لا بيا ولا عليا والقى عمرو حدفنى بدبشه فى دماغى
أه والله حدفنى بدبشه
الدبشه دى يا ساده كان خبر قراه عمرو فى جريده وتقريبا مذكرش اسمها أو ذكره وأنا اللى نسيته
المهم ومن غير رغى كتير هو الخبر
الخبر كان بيقول ان الدوله قررت انها تسفر أعضاء من مجلش الشعب للحج على نفقة الدوله
ان ان ان تششششششششششششششش
طيب ازاى ؟ والنبى حد يرد عليا ويقولى ازاى؟؟
المفروض أن الناس دى دخلت مجلس الشعب عشان تخدمنا مش عشان تطلع حج على حسابنا
وبعدين حج ايه ده اللى ربنا هيقبله منك وهو مش من فلوسك
متهيألى أن فى ناس كتير اولى بالفلوس دى
فيها ناس بتموت من المرض ومش لاقيه تمن العلاج
فى أطفال مرمين فى الشارع ومش لاقين مكان يستخبوا فيه من البرد
فى حاجات كتير أوى بقت تقطع القلب
ملحوظه رفيعه :الصوره من مدونه احمد الصباغ (خالوا أحمد)
Subscribe to:
Posts (Atom)
