أقر أنا المذكور أعلاه

قررت أن أتنحى تماما ونهائيا عن أى بوستا رسمى وأن أعود الى صفوف القراء


أقرأ فقط ما تبدعه أيديكم وأن أتعلم من جديد ربما أكون لا أجيد فن الكتابه ولا التعبير ولا الرسم بالكلمات



ولا أجيد توصيل الفكره وربما أجد وجها أخر للكتابه لم أعرفه

كله زى بعضه

اه والله كله زى بعضه .....كل الاغانى والمسلسلات والافلام واى حركات بقت زى بعض

نفس القصص والحكايات وده مخلينى مستغربه

عندنا حاجات كتير أوى ممكن نناقشها من خلال أغنيه أو فيلم أو مسلسل

وكل يوم بتظهر ع الساحه أحداث جديده وقضايا وحكايات ممكن أوى نتكلم فيها

لكن أحنا تقريبا بقينا بنستسهل نجدد أو نتكلم أو نناقش

بقينا ديما بنعيد فى الافكار والحكايات القديمه

مش عارفه هل ده من باب ان ف الاعاده افاده؟

أو كتر التكرار يعلم الحمار؟

أو أيه أنا الحقيقه مش عارفه

عشان كده بشتاق أن واحد زى على الحجار أو محمد منير ينزلوا ألبوم جديد

لان حتى ف المواضيع المستهلكه كلمات جديده وحلوه

وشبهنا بردو ومن كلامنا مش غريبه علينا يعنى بس أحنا نسيناها

زى ما نسينا حاجات تانيه كتير

أو أفتكرنا حاجات نستنا نفسنا

أو بنمتحن ولازم نقوم نزاكر دلوقتى عشان أنا أتخنقت خلاص وهطق

يلا بقا سلام

أذكروا محاسن موتاكم

فى حاجه مضياقنى أوى

هى الكلام على الناس اللى أنتقلت اللى رحمت الله وسابت الدنيا باللى فيها وقابلت وجه

الكريم

وهو اللى هيحاسبها ويديها جزاءها اللى أحنا قطعا منعرفش أيه هو

الاول أتكلمنا على سوزان تميم واللى جرالها متجوزه أتنين لاء مش متجوزه

طلعت مصطفى اللى قتلها لاء مش هو أيه الحكايه فين منين

وكل واحد حكى الحكايه اللى هو شايفها صح ف حين ان ربنا بس هو الاعلم باللى حصل

تانى حاجه اللى بيحصل اليومين دول من كلام فى قضية هبه ونادين وطبعا عشان هبه بنت


ليلى غفران أتقال ياما ف الخمر من كلام

عليها وعلى صديقتها

أنا مش هقول أن أنا مقتنعه بحكاية السرقه والواد اللى جابوه وقالوا ده الحرامى وهو اللى

قتلهم وبتاع

وده عشان كذا حاجه عشان الواد ولا جسمه ولا شكله ولا سنه يخلوه يعمل كده

ولا كلامه نفسه وهو بيتكلم يقدر يقنعك بان ده اللى عمل كده و ف برنامج العاشره مساء ليلى

غفران كانت موجوده وقالت بنفسها انها مش مقتنعه

لكن الللى مضايقنى الكلام فى شرف حد بقا بين أيدين ربنا أصلا

أه طبعا لازم نعرف الحقيقه لان متهيالى أن القضيه مش بس قضية بنتين أتقتلوا بطريقه

وحشه

لكن حاسه أن القضيه دى لازم تغير فى الاعلام والصحافه والامن كمان شوية حاجات

بس بلاش أحنا نتكلم ونقول كان فيه وكان فيه ونقول تلاقيها هى وصاحبتها دول كذا

لاء دى كانت متجوزه لا مش متجوزه

أمها مش فاضيه لحاجه غير الكليبات

معرفش ليه أنا مبحبش الخوض فى أعراض حد توفى ولا طبعا حد على قيد الحياه

لكن حد ميت دى بحس أنها تقيله أوى على قلبى

فاللى أنا عايزه أوصله ف النهايه أننا نستنى لحد ما الحقيقه تبان وبلاش نتكلم على أى حد

مشهور أو غير مشهور بأن سبب وفاته

يخص الشرف أو انه لما أتقلت كانت حياته فيها وفيها

الله أعلم أحنا أزاى هنتوفى وياترى لما نموت هنموت موته عاديه وندفن وبعدين خلصت ولا

أيه ممكن يحصل وأيه ممكن يتقال

سيبوا اللى راح عند ربنا لربنا

وبردو سيبوا اللى لسه بردو لربنا احد ما تتضح الحقيقه


ربنا يخرجنا من الدنيا دى على خير لان الناس بقت صعبه أوى

يارب يكون اللى عوزاه وصل

الراجل ده مستنى ايه؟

لما تقرأ أو تسمع عن تسريب أمتحانات الثانويه العامه

ولما تقرأ أو تسمع عن الطلبه اللى أنتحروا بعد نتايج الثانويه العامه

ولما تعرف أن فيه مدرس موت طالب أو حتى طالب ضرب مدرس

ولما تقعد تتفرج على برنامج وتشوف كارثة الكوارث

طفله ف الصف الثانى الابتدائى بتحكى عن مدرسها اللى أتحرش بيها وببنات تانيه ف الفصل بتاعها

يبقا السؤال اللى المفروض نسأله الرجل اللى مسؤول عن كل ده

وهو الوزير يسرى الجمل مستنى أيه عشان يتحرك

ولو مش قادر أو مش عارف ليه مستنى فى مكانه أصلا

فى حمله عالفيس بوك لعزل وزير التربيه والتعليم يسرى الجمل

أعتقد أن الحمله دى لازم يكون ليها صوت ولا أيه رأيكم؟

بلا عنوان

بلغت من العمر 20 عاما ولا زلت بلا هدف

حتى بلا أمل

كليبات

طبعا مع أنشار مليون قناة لاذاعة الاغانى المصوره بطريقة الفيديو كليب لازم الواحد قبل ما ينزل الكليه الصبح وهو بيضرب

كوباية الشاى باللبن أو النسكافيه أحيانا حسب التساهيل يقلب بردو ف التليفزيون شويه ويشوف أيه النظام وأنا كتير اوى بتوقف أودام قنوات

الآغانى أهو الواحد يهيس شويه قبل ما يشوف وشوش الدكاتره والكتب ويصاب بالاكتئاب

المهم أثناء رحلاتى بين القنوات ديما لازم الاقى معظم الكليبات فيها مغنيين طالعين يستحموا

اه والله اكيد بتشفوها كأنهم معندهمش وقت ياخدوا الشور بتاعهم غير وهما بيصورها الكليب

وممكن تلاقى ف الكليب بانيو محطوط وسط صحرا والمغنى بردو بياخد الشور بتاعه

أو تلاقى البنات اللى بيرقصوا ورا بيدقلوا على نفسهم ميه

من الحر تقريبا

حتى الاعلانات بقت بردو فيها ثقافة الاستحمام

ومتفهمش أيه علاقة هذه الثقافه المتطوره طبعا بموضوع الاغنيه أو كلماتها أو اللحن أو اى بتنجان

يعنى مثلا لو الاغنيه بتقول الطشت قالى الطشت قالى

كنا قولنا ماشى الاستحمام نسبة الى الطشت

لو اغنية الميه تروى العطشان كنا قولنا البنات اللى بيرقصوا بيدلقوا على نفسهم ميه عشان العطش والحر والخنقه زى ما انتوا عارفين

حتى الان لا أحد يعرف من أين نبعت تلك الثقافه اللى كلها نضافه وألقت بظلالها على الكليبات

فى أنتظار اخر التطورات وسنوافيكم بأهم الانباء

شكرا لكم

دراسه

مش عارفه أكتب أى حاجه من ساعة ما روحت الكليه

تقريبا الواحد لما بيدخل المحاضره بيستغبى

ومحدش فيكم بيسأل عليا

مش مهم

المهم أنكم تدعولى من قلبكم

تدعولى ربنا يحققلى اللى نفسى فيه

واضح أنى بخرف

سلام

سبحان الله

حقيقى سبحان الله

محل شوزات وأسمه كاتشب

أستفتاء

قررنا أنا وواحده صديقتى أننا نعمل مجله ألكترونيه عالنت يعنى

لكن لسه مخترناش الاسم ياريت تساعدونى فى اختياره

1- دربكه

2- شخبطه

3- قصاقيص

4-الحقونا

5-بلا قافيه

6- ع المكشوف

ياريت تكتبوا فى التعليقات الاسم اللى عجبكم

وياريت لو حد عايز ينضم ويكتب معانا كمان احنا بنرحب

ولو حد يقدر يعملنا التصميم بتاع المجله يبقا كتر خيره

عشمى فيكم كبير وعارفه انكم مش هتخذلونى

من حقك

من حقك تعيش فى مكان كله خضره فى الوقت اللى فيه ناس كتير مش لاقيه أربع حيطان يلموها

من حقك تصيف السنه دى وتدفع على مهلك فى الوقت اللى فيه ناس مش لاقيه حق الرغيف

ولما تمشى البيت هيتنضف لوحده وبردو هيتأجر لوحده فى الوقت اللى فيه أطفال لسه أسمهم أطفال الشوارع

من حقك تعيش فى مكان نضيف وهواء نضيف وحمامات سباحه وملاعب جولف فى الوقت اللى فيه ناس مش لاقيه حق الدوا

وبتعيش فى الخرابات وسط الزباله زى الكلاب وبيشموا كولا تحت الكوبرى

وفى بردو ناس بتموت فى المستشفيات

من حقك تنعم بالرفاهيه فى الوقت اللى فيه ناس مش عارفه تنعم بلقمه نضيفه

شتان الفارق بين حال الناس بجد فى الشارع وحال الاعلانات اللى بتقولك أنه من حقك

من حقك بس لو أنت حرامى ومعاك فلوس

عشان محدش يطول لسانه ويقولى وأنتى بقا بتفكرى فى الناس دى وأنتى قعده بتتفرجى عالتليفزيون

هقوله لو مكنتش بفكر فيهم مكنتش كتبت البوست ده عشان كلنا نفتكرهم

كلام بكلام

حلو العنوان مأخوذ عن الاغنيه للمطرب الشهير حكيم

والكلام النهارده عن كادر المعلمين

ومش هتكلم كتير وأقول أهانه وعيب وميصحش كده يا جماعه أنتوا أخوات

لان الكلام ده أتقال كتير وبقا قديم وشكله مش حلو


لكن السؤال الذى طالما لعب فى دماغى بمفك هو


لما محافظه كامله من محافظات مصر لم ينجح فيها أحد

اذا كل هؤلاء المعلمين غير مؤهلين لمزاولة المهنه

السؤال بقا طيب هما لسه فى المدارس لحد دلوقتى بيعملوا أييييييييييييييييييييه؟؟؟


ياريت حد يجاوبنى

بلا عنوان

- البلد دى مش هيتصلح حالها الا لو لموا كل الصحفيين وولعوا فيهم

- السياسه دى قاسيه اوى

- أشمعنا أنا يابنى اللى مش عايزنى أسرق ما البلد كلها بتسرق أشمعنا أنا اللى عايزنى أبقا شريف حتى وحش على صحتى

أبنك على ما تربيه

أيوه بالظبط أبنك على ما تربيه وهما ربونا كده

ربونا على أن كلية الطب والاعلام والصيدله والاسنان والعلوم والاقتصاد والعلوم السياسه والشرطه ..... الخ

هما أصحاب الصوت العالى وأصحاب المفام الرفيع

ربونا على أن البلطو الابيض له أحترامه عشان الناس تقول الدكتور راح والدكتور جه

المهندس راح والمهندس جه

أنا أبنى دكتور وأنا ابنى ضابط

هما ربونا كده والمجتمع ماشى كده

ونسيوا مهنة التدريس والميكانيكى والسباك وسواق التاكسى اللى بيغلى الاجره بس ما علينا

وسواقين الاختراع الفظيع والذى يسمى بالميكروباص وما بعده من أختراعات الجيل التالت والتى تسمى بالتوك توك

وغير كده من المهن حتى لو البنت يجيلها عريس أول سؤال بتشتغل أيه وياترى ده هيلمع البت ويحطها فى برواز كويس ولا لاء

وحتى دلوقتى لما بقوا الدكاتره غلابه ومش لاقين شغل بردو كلية الطب ليها احترامها

أنا كنت هموت عشان أدخل كلية الطب ولما دخلت علوم حسيت أنى فاشله ولانى كنت بسافر للكليه ويوم ما قررت

أحول منها لكلية أداب أعتبرت ان الدراسه دى زى الجيش أربع سنين هقضيهم وخلاص بلا هدف

منكرش أنى حبتها بعد كده وبقا عندى أمل أعمل حاجه لكن دى كانت حالتى ساعتها

وبعد كل ده بتخفضوا أعداد المقبولين بكلية الطب وبعد ما طلع عين العيال واهلهم بتقولولهم لاء سورى كان فى منه وخلص

لااااااااااااااااااا يبقا كده حرام بدل ما تيجوا عليهم صلحوا نفسكم

أعملوا مزانيه أكبر للصرف على الفئه دى

شوفوا حل لموضوع التنسيق العقيم بتاعكم ده

طول القرون اللى فاتت عمالين تعشمونا بالحق لحد ما خرمنا ودانا وودان جيرانا واهلينا وكل اللى نعرفهم

وجايين دلوقتى تقوللنا مفيش حلق

لاء والف لاء حرام الفلوس اللى صرفوها الاهالى وحرام التعب اللى تعبوه العيال وفى الاخر فاز بكلية الطب اللى

أبوه معاه فلوس يشترى بيها الامتحان

أنا مش عارفه أقول أيه

سبتلكم باقى الكلام

هو فى أيه؟؟؟

من خلال نظرتى الفاحصه الماحصه خلال الايام الماضيه

لاحظت أن الناس أصيبت بحاله من قلة الذوق

بمعنى أنك تبقى ماشى فى الشارع وحد يخبط فيك وميعتذرش

أو يرش عليك ميه ويبقا تنح بردو وميعتذرش

والحاجه اللى بتحصل معايا بقا أن الجيران اللى فوقينا بينشروا غسيلهم على غسيلنا والميه تغرق الغسيل وميقولوش من فضلكم غطوا غسيلكم


ومره كنت واقفه اودام محل بتفرج على حاجات ولقيت البنت اللى فى المحل اللى جنبه طالعه تنفض التراب وأنا واقفه جمبها بالظبط ومقالتش

من فضلك ابعدى شويه عشان أنضف

فالموضوع ده لفت نظرى اوى اوى اوى أن الناس أصيبت بحاله من قلة الذوق

تفتح بلكونة بيتكم عشان تشم الهوا تلاقى واحد بيدرس الموقع الجغرافى لشقتكم

فتضطر أنك تقفل البلكونه فى وشه وتدخل تتفرج عالتليفزيون اللى غالبا مبيعرضش حاجه مفيده

الاله يقدم الاستقاله

الاله يقدم الاستقاله ده أسم كتاب للدكتوره نوال السعداوى وبعيدا عن العنوان وعن مضمون الكتاب

والذى لا أعرف ما كنيته بالتحديد هل هو كتاب سياسى أم دينى أم أى نوعا من الكتب هو

حقا لا أدرى ولكن ما عرفته أنه روايه

أنا لم أقرأ الكتاب ولن أناقش مضمونه ولكن ما لفت نظرى هو أننا لسه بنتكلم بلا استناره

على قناة الحياه فى برنامج أسمه الحياه اليوم تم مناقشة هذا الكتاب

والمفروض مدام دى مناقشه يبقى تناقش محتوى الكتاب

ومدام هتناقش محتوى الكتاب يبقى المفروض الناس اللى جايه تهاجم الدكتوره نوال السعداوى عندها فكره عن الكتاب وقرته

الا اننى أكتشفت العكس

البرنامج كان مستضيف أحد علماء الازهر واللى مكلفش خاطره حتى بأن يلقى نظره على الكتاب

وأنما أكتفى بقراءة العنوان ومن ثم بدأ فى القاء الاتهامات

أنا ولا مع نوال السعداوى ولا ضدها ولا أعرفها أصلا ولا أعرف أفكارها عامله أزاى ولكن كل اللى لفت نظرى زى ما قلت هو أننا مش بناقش الناس على أستناره وأدراك


مش بناقش وأحنا فاهمين وده اللى مخلينا ورا

أنا عالم دين رايح أناقش س من الناس وهذا ال س كافر أو ملحد او له افكار بعيده عن الاسلام المفروض

أن أنا اقرأ أفكاره وكتبه واشوف هو بيفكر أزاى بيدعو لآيه أيه هى الطريقه اللى ممكن أناقشه بيها وأقنعه

وعجبنتنى اوى دكتوره سعاد صالح لما عملت مداخله تليفونيه وقالت أنا هقرأ كل كتب الدكتوره نوال وبدعوها لعمل مناظره فكريه ومناقشه بعد عودتها من مدريد

لآن ده المفروض وده المظبوط أنى لما أروح اناقش حد أعرف الآول أنا بكلم مين

لكن لسه علماء الازهر العظماء بيتكلموا بس وخلاص لكن قروا ولا فهموا ولا عرفوا بيتكلموا عن أيه كل ده مش مهم

أى صاحب فكر كافر وخلاص

المفروض اننا ندعوا الى سبيل ربنا بالحكمة والموعظة الحسنه

يعنى بدل ما اكفر الناس أحاول أقنعهم

بس يارب يكون اللى عوزاه وصلكم

والله محدش يستاهل

على فكره أنا كنت محضره موضوع تانى أتكلم فيه
بس الكلام ده حساه أوى بقا ولازم أقوله
أن محدش يستاهل أنك تقف جمبه أو تساعده أو تفكر فيه أو تحبه ولا حتى أقرب الناس ليك
مهما حبيتهم ومهما فكرت أنهم بيحبوك
حقيقه ديما أودامنا وأحنا اللى مش عايزين نشوفها أن الحب والعشره والخوف والاخوه والصداقه كل ده أساطير مش موجوده
خصوصا الحب

حسبى الله ونعم الوكيل

بجد حسبى الله ونعم الوكيل
الامتحانات يا ساده بدأت يوم 26/5 والحمد لله عدى امتحان الادب الامريكى على خير وبعده الحضاره على خير والعربى والدراما كل ده عدى على خير
أتاريهم بقا بيرقدولنا ...اه أمال أيه بيسجدونا عشان فى الاخر يدونا على قفانا وعارفين طبعا أننا مش هنقدر نتكلم
يوم 17/6 كان أمتحان النقد الادبى ومحدش يسألنى يعنى أيه نقد أدبى عشان الاحراج بس
اللجنه كانت الساعه 10 ادونا ورق الاجابه وسطرنا والورق بقا شيك واسمنا والتاريخ وحركات واذا بورق الاسئله يتحط اودامنا
ان ان ان ان تششششششششش
هند هند هو ايه الاسئله دى
أنا : والله يا وسام ما أعرف
ياسمين : هند هو احنا هنتكلم عن ايه
أنا : أتكلمى عن مأساتك ياختى سيبونى فى حالى
واحده جمبى معرفهاش : هند هتحلى انهو سؤال
أنا : لاء سوؤال ايه انتوا مش فاهمين ده مش الامتحان أستنوا اكيد فى ورقه تانيه
واذا باللجنه تتحول الى مظاهره
ده مش المنهج
فين الدكتور
ايه الاسئله دى
ولا حياة لمن تنادى دخل الدكتور اللى بيمر على اللجان يا جماعه مش أنتوا اللجنه الوحيده اللى مش عارفه تحل كل اللجان كده اللى مش عارف حاجه يسيب الورقه ويمشى متوجعوش دماغى ومفيش دكتور هيجى يلا خلصونا
وفجأه لقيت كل الطلبه سايبه الورقه بيضه فله شمعه منوره وبتمشى
ساعتها بس ايقنت ان ده الامتحان وان مفيش ورقه تانيه ولا حاجه
طيب بس الله الرحمن الرحيم هى دى الاسئله
اه السؤال الاول
the end of poetry is pleasure
اه أنا شوفت كلمه
pleasure
دى قبل كده أحنا بقا بالصلاه عالنبى ندخلها فى جمل
وبلا فخر يا ساده كتبت صفحه ونص بحالهم وطبعا سايبه سطر عن هذه الجمله الفظيعه جدا والجديده اوى بالنسبالى والحمد لله خلصت بعد نص الوقت واصيبت بحاله من الاكتئاب وقررت انى اسلم الورقه وأمشى قبل ما يجيلى أنهيار عصبى أو تتفقع مرارتى أو أموت قبل ما أشوف أمتحان الشعر
كان معكم على أسم مصر من امام مدرج 2 كليه الاداب جامعه طنطا

أمتحانااااااااااااااااااااااات

مغلق الى أجل غير مسمى بسبب الامتحانات
أدعولنا يا رجاله

أنا أتسرقت يا رجاله

مرسى أبن الزناتى أتهزم يا مينزززززززز
بالانجليزى
بس مش مرسى اللى أتهزم أنا اللى أتسرقت يا رجاله وبالعربى
أمبارح أثناء رحلتى فى المدونات روحت مدونة أخف دم وكان كاتب بوست قديم عن مواضيعى وقصايده اللى بتسرق
أنا بقى نفشت ريشى وقلت أكيد اى خاطره كتبتها متسرقتش عشان أنا أصلا عيله وبخرف زى ما أنتى عارفين
عملت سيرش عند عمنا جوجل وكتبت فى من أنا اللى كنت كتباها فى بوست عيله وبتخرف
وملقتش حاجه فرحت أوى قلت أيوه كده مهو مين هيسرق عيله وبتخرف زيى
قلت طيب أجرب تانى كتبت جمله كامله من الخاطره العبيطه اللى كنت كتباها واذا بالمفاجأه تصيبنى بالدوار واحد عبيط كاتب الخاطره كامله
كلها والله كلها ومسميها محدش يستاهلك يا قلبى
يا أخى كتك وجع فى قلبك يارب وتتقطع أيدك اللى سرقت بيها حاجاتى
مش عشان أنا بت مقطعه السمكه طرنشات وديلها حلقات ومفيش منى اتنين لاء أحنا أتفقنا من الاول أنى عيله وبخرف
لكن علشان بجد كل كلمه كتبتها سواء كانت فى بوست او غيره او حتى كتبتها فى كتاب ولا ورقة لحمه وأنا قعده بزاكر كانت طالعه من قلبى بجد
لما كتبت من أنا ده مكنش من باب الابداع لاء ده كان عشان فعلا أنا فى الفتره دى مكنتش لاقيه نفسى
من أنا دى أنا كتبتها زماااااان على منتدى هانى حسين بتاع استار أكاديمى الله اعلم بقى الامور اللى خدها خدها أمتى ومنين
حبيت بس أقولك كل واحد يحافظ على حاجاته وأى حاجه بيكتبها مينزلهاش عالنت مالها البوستات العاديه اللى أحنا بنكتبها
وعلى فكره مش لازم نكون كتاب عظماء عشان نخاف على حاجتنا كفايه نخاف عليها عشان هى بتعبر عننا وعن حاله عشناها عن كل كلمه فيها حته مننا سواء كانت حلوه او وحشه غلط أو صح
كفايه بس أن أحنا فيها وشخصيتنا مرسومه بين سطورها
وفى النهايه عايزه أقول حسبى الله ونعم الوكيل ويارب ايده تتقطع اللى ياخد حاجه مش بتاعته من أى حته وينسبها لنفسه يارب

احنا مش ملايكه ولازم نتغير

بصوا بقى أنا عايزه أتكلم معاكم فى حاجه ومش عايزه حد يفهمنى غلط مش عايزه النوايا اللى مش ولابد تطلع
وكل واحد كرامته تنقح عليه وياخد الكلام على نفسه لانه ساعتها هيبقى على راسه بطحه وبيحسس عليها
ندخل فى الموضوع على طول أنا كلامى هيبقى طالع من القلب ويارب يوصل زى ما أنا عايزه أوصله
كلنا بنشتم فى الدنيا والناس والزمن
والاخلاق اللى أنحطت وكلنا مجروحين وفى ناس كدبت علينا وأتغشينا وأتخدعنا وفى ناس طلعت نص كوم معانا وفى وفى وفى
طيب وأحنا .. أحنا أيه؟ أحنا ملايكه ؟ أحنا مبنكدبش؟ أحنا عمرنا ما عملنا موقف نص كوم مع حد ؟ عمرنا ما عرفنا حد وكلمناه بس عشان لينا طلب عنده؟ عمرنا ما كنا ناس مصلحجيه؟ عمرنا ما رمينا الورق فى الشارع ووسخنا البلد؟ عمرنا ما جبنا لب ومشينا ناكل ونتف؟ عمرنا ما أستغلينا وسطتنا ولو حتى فى طابور العيش عشان ننجز ونخلص المصلحه؟
عملنا كل ده بس أحنا خايفين نشوف نفسنا
يا أما كدبت عشان أخرج من مواقف محرجه اتحطيت فيها
يا اما روحت كلمت ناس عشان مصلحه عايزاها منهم وبعد ةكده محاولتش أرفع سماعة التليفون أسأل عليهم
يا أما مشيت أرمى ورق فى الشارع وأوسخ البلد وكتبت على البنج فى الكليه
وأستغليت وسطتى عشان أجيب نتيجه أو أوصل لدكتور أو أخلص أى مصلحه
وعرفت ناس عشان أخد منهم ورق
وعملت مع ناس مواقف مش ولا بد
أحنا مش بس بنتجرح أحنا بنعمل حاجات تجرح
بس هى لما الحاجه بتيجى فينا كرمتنا بتنقح علينا ونقول لاء أنا عمرى ما أعمل كده
ده فلان طلع اى كلام وفيه وفيه وفيه وأحنا لاء أحنا ملايكه أحنا كويسين احنا بنحب البلد أحنا مبنعملش حاجه غلط
مش عارفه ايه علاقة كل ده ببعضه بس أصلى شايفه الناس بتنتقد وتشجب وتستنكر كل حاجه ومش باصين لنفسهم مش بيدورا على غلطهم يا جماعه يلا نبص جوانا خلى عندنا اربع عيون اتنين نشوف بيهم نفسنا واتنين نشوف بيهم اللى حوالينا
نشتغل على نفسنا ونغير الحاجات الوحشه
أنا بدأت أتغير والله بتغير وبقيت ببص لنفسى قبل ما أنتقد غيرى لو فى موقف عدى أودامى معجبنيش بقيت بفتكر انا عملت ده قبل كده ولا لاء طيب لو مكان اللى عمل كده هتصرف ازاى والله العظيم وبدون اى مثاليه بقيت بجاوب على نفسى
انا مكنتش كده بس بدأت أعمل كده
تحياتى ليكم