فى حاجه مضياقنى أوى
هى الكلام على الناس اللى أنتقلت اللى رحمت الله وسابت الدنيا باللى فيها وقابلت وجه
الكريم
وهو اللى هيحاسبها ويديها جزاءها اللى أحنا قطعا منعرفش أيه هو
الاول أتكلمنا على سوزان تميم واللى جرالها متجوزه أتنين لاء مش متجوزه
طلعت مصطفى اللى قتلها لاء مش هو أيه الحكايه فين منين
وكل واحد حكى الحكايه اللى هو شايفها صح ف حين ان ربنا بس هو الاعلم باللى حصل
تانى حاجه اللى بيحصل اليومين دول من كلام فى قضية هبه ونادين وطبعا عشان هبه بنت
ليلى غفران أتقال ياما ف الخمر من كلام
عليها وعلى صديقتها
أنا مش هقول أن أنا مقتنعه بحكاية السرقه والواد اللى جابوه وقالوا ده الحرامى وهو اللى
قتلهم وبتاع
وده عشان كذا حاجه عشان الواد ولا جسمه ولا شكله ولا سنه يخلوه يعمل كده
ولا كلامه نفسه وهو بيتكلم يقدر يقنعك بان ده اللى عمل كده و ف برنامج العاشره مساء ليلى
غفران كانت موجوده وقالت بنفسها انها مش مقتنعه
لكن الللى مضايقنى الكلام فى شرف حد بقا بين أيدين ربنا أصلا
أه طبعا لازم نعرف الحقيقه لان متهيالى أن القضيه مش بس قضية بنتين أتقتلوا بطريقه
وحشه
لكن حاسه أن القضيه دى لازم تغير فى الاعلام والصحافه والامن كمان شوية حاجات
بس بلاش أحنا نتكلم ونقول كان فيه وكان فيه ونقول تلاقيها هى وصاحبتها دول كذا
لاء دى كانت متجوزه لا مش متجوزه
أمها مش فاضيه لحاجه غير الكليبات
معرفش ليه أنا مبحبش الخوض فى أعراض حد توفى ولا طبعا حد على قيد الحياه
لكن حد ميت دى بحس أنها تقيله أوى على قلبى
فاللى أنا عايزه أوصله ف النهايه أننا نستنى لحد ما الحقيقه تبان وبلاش نتكلم على أى حد
مشهور أو غير مشهور بأن سبب وفاته
يخص الشرف أو انه لما أتقلت كانت حياته فيها وفيها
الله أعلم أحنا أزاى هنتوفى وياترى لما نموت هنموت موته عاديه وندفن وبعدين خلصت ولا
أيه ممكن يحصل وأيه ممكن يتقال
سيبوا اللى راح عند ربنا لربنا
وبردو سيبوا اللى لسه بردو لربنا احد ما تتضح الحقيقه
ربنا يخرجنا من الدنيا دى على خير لان الناس بقت صعبه أوى
يارب يكون اللى عوزاه وصل
Tuesday, December 9, 2008
أذكروا محاسن موتاكم
Tuesday, November 18, 2008
الراجل ده مستنى ايه؟
Sunday, November 9, 2008
Wednesday, October 15, 2008
كليبات
Monday, October 13, 2008
دراسه
مش عارفه أكتب أى حاجه من ساعة ما روحت الكليه
تقريبا الواحد لما بيدخل المحاضره بيستغبى
ومحدش فيكم بيسأل عليا
مش مهم
المهم أنكم تدعولى من قلبكم
تدعولى ربنا يحققلى اللى نفسى فيه
واضح أنى بخرف
سلام
Friday, September 26, 2008
Tuesday, September 16, 2008
أستفتاء
قررنا أنا وواحده صديقتى أننا نعمل مجله ألكترونيه عالنت يعنى
لكن لسه مخترناش الاسم ياريت تساعدونى فى اختياره
1- دربكه
2- شخبطه
3- قصاقيص
4-الحقونا
5-بلا قافيه
6- ع المكشوف
ياريت تكتبوا فى التعليقات الاسم اللى عجبكم
وياريت لو حد عايز ينضم ويكتب معانا كمان احنا بنرحب
ولو حد يقدر يعملنا التصميم بتاع المجله يبقا كتر خيره
عشمى فيكم كبير وعارفه انكم مش هتخذلونى
Sunday, September 7, 2008
من حقك
Wednesday, August 27, 2008
كلام بكلام
حلو العنوان مأخوذ عن الاغنيه للمطرب الشهير حكيم
والكلام النهارده عن كادر المعلمين
ومش هتكلم كتير وأقول أهانه وعيب وميصحش كده يا جماعه أنتوا أخوات
لان الكلام ده أتقال كتير وبقا قديم وشكله مش حلو
لكن السؤال الذى طالما لعب فى دماغى بمفك هو
لما محافظه كامله من محافظات مصر لم ينجح فيها أحد
اذا كل هؤلاء المعلمين غير مؤهلين لمزاولة المهنه
السؤال بقا طيب هما لسه فى المدارس لحد دلوقتى بيعملوا أييييييييييييييييييييه؟؟؟
ياريت حد يجاوبنى
Tuesday, August 5, 2008
بلا عنوان
Saturday, July 26, 2008
أبنك على ما تربيه
Saturday, July 19, 2008
هو فى أيه؟؟؟
من خلال نظرتى الفاحصه الماحصه خلال الايام الماضيه
لاحظت أن الناس أصيبت بحاله من قلة الذوق
بمعنى أنك تبقى ماشى فى الشارع وحد يخبط فيك وميعتذرش
أو يرش عليك ميه ويبقا تنح بردو وميعتذرش
والحاجه اللى بتحصل معايا بقا أن الجيران اللى فوقينا بينشروا غسيلهم على غسيلنا والميه تغرق الغسيل وميقولوش من فضلكم غطوا غسيلكم
ومره كنت واقفه اودام محل بتفرج على حاجات ولقيت البنت اللى فى المحل اللى جنبه طالعه تنفض التراب وأنا واقفه جمبها بالظبط ومقالتش
من فضلك ابعدى شويه عشان أنضف
فالموضوع ده لفت نظرى اوى اوى اوى أن الناس أصيبت بحاله من قلة الذوق
تفتح بلكونة بيتكم عشان تشم الهوا تلاقى واحد بيدرس الموقع الجغرافى لشقتكم
فتضطر أنك تقفل البلكونه فى وشه وتدخل تتفرج عالتليفزيون اللى غالبا مبيعرضش حاجه مفيده
Tuesday, July 8, 2008
الاله يقدم الاستقاله
الاله يقدم الاستقاله ده أسم كتاب للدكتوره نوال السعداوى وبعيدا عن العنوان وعن مضمون الكتاب
والذى لا أعرف ما كنيته بالتحديد هل هو كتاب سياسى أم دينى أم أى نوعا من الكتب هو
حقا لا أدرى ولكن ما عرفته أنه روايه
أنا لم أقرأ الكتاب ولن أناقش مضمونه ولكن ما لفت نظرى هو أننا لسه بنتكلم بلا استناره
على قناة الحياه فى برنامج أسمه الحياه اليوم تم مناقشة هذا الكتاب
والمفروض مدام دى مناقشه يبقى تناقش محتوى الكتاب
ومدام هتناقش محتوى الكتاب يبقى المفروض الناس اللى جايه تهاجم الدكتوره نوال السعداوى عندها فكره عن الكتاب وقرته
الا اننى أكتشفت العكس
البرنامج كان مستضيف أحد علماء الازهر واللى مكلفش خاطره حتى بأن يلقى نظره على الكتاب
وأنما أكتفى بقراءة العنوان ومن ثم بدأ فى القاء الاتهامات
أنا ولا مع نوال السعداوى ولا ضدها ولا أعرفها أصلا ولا أعرف أفكارها عامله أزاى ولكن كل اللى لفت نظرى زى ما قلت هو أننا مش بناقش الناس على أستناره وأدراك
مش بناقش وأحنا فاهمين وده اللى مخلينا ورا
أنا عالم دين رايح أناقش س من الناس وهذا ال س كافر أو ملحد او له افكار بعيده عن الاسلام المفروض
أن أنا اقرأ أفكاره وكتبه واشوف هو بيفكر أزاى بيدعو لآيه أيه هى الطريقه اللى ممكن أناقشه بيها وأقنعه
وعجبنتنى اوى دكتوره سعاد صالح لما عملت مداخله تليفونيه وقالت أنا هقرأ كل كتب الدكتوره نوال وبدعوها لعمل مناظره فكريه ومناقشه بعد عودتها من مدريد
لآن ده المفروض وده المظبوط أنى لما أروح اناقش حد أعرف الآول أنا بكلم مين
لكن لسه علماء الازهر العظماء بيتكلموا بس وخلاص لكن قروا ولا فهموا ولا عرفوا بيتكلموا عن أيه كل ده مش مهم
أى صاحب فكر كافر وخلاص
المفروض اننا ندعوا الى سبيل ربنا بالحكمة والموعظة الحسنه
يعنى بدل ما اكفر الناس أحاول أقنعهم
بس يارب يكون اللى عوزاه وصلكم
Saturday, June 28, 2008
والله محدش يستاهل
على فكره أنا كنت محضره موضوع تانى أتكلم فيه
بس الكلام ده حساه أوى بقا ولازم أقوله
أن محدش يستاهل أنك تقف جمبه أو تساعده أو تفكر فيه أو تحبه ولا حتى أقرب الناس ليك
مهما حبيتهم ومهما فكرت أنهم بيحبوك
حقيقه ديما أودامنا وأحنا اللى مش عايزين نشوفها أن الحب والعشره والخوف والاخوه والصداقه كل ده أساطير مش موجوده
خصوصا الحب
Thursday, June 19, 2008
حسبى الله ونعم الوكيل
بجد حسبى الله ونعم الوكيل
الامتحانات يا ساده بدأت يوم 26/5 والحمد لله عدى امتحان الادب الامريكى على خير وبعده الحضاره على خير والعربى والدراما كل ده عدى على خير
أتاريهم بقا بيرقدولنا ...اه أمال أيه بيسجدونا عشان فى الاخر يدونا على قفانا وعارفين طبعا أننا مش هنقدر نتكلم
يوم 17/6 كان أمتحان النقد الادبى ومحدش يسألنى يعنى أيه نقد أدبى عشان الاحراج بس
اللجنه كانت الساعه 10 ادونا ورق الاجابه وسطرنا والورق بقا شيك واسمنا والتاريخ وحركات واذا بورق الاسئله يتحط اودامنا
ان ان ان ان تششششششششش
هند هند هو ايه الاسئله دى
أنا : والله يا وسام ما أعرف
ياسمين : هند هو احنا هنتكلم عن ايه
أنا : أتكلمى عن مأساتك ياختى سيبونى فى حالى
واحده جمبى معرفهاش : هند هتحلى انهو سؤال
أنا : لاء سوؤال ايه انتوا مش فاهمين ده مش الامتحان أستنوا اكيد فى ورقه تانيه
واذا باللجنه تتحول الى مظاهره
ده مش المنهج
فين الدكتور
ايه الاسئله دى
ولا حياة لمن تنادى دخل الدكتور اللى بيمر على اللجان يا جماعه مش أنتوا اللجنه الوحيده اللى مش عارفه تحل كل اللجان كده اللى مش عارف حاجه يسيب الورقه ويمشى متوجعوش دماغى ومفيش دكتور هيجى يلا خلصونا
وفجأه لقيت كل الطلبه سايبه الورقه بيضه فله شمعه منوره وبتمشى
ساعتها بس ايقنت ان ده الامتحان وان مفيش ورقه تانيه ولا حاجه
طيب بس الله الرحمن الرحيم هى دى الاسئله
اه السؤال الاول
the end of poetry is pleasure
اه أنا شوفت كلمه
pleasure
دى قبل كده أحنا بقا بالصلاه عالنبى ندخلها فى جمل
وبلا فخر يا ساده كتبت صفحه ونص بحالهم وطبعا سايبه سطر عن هذه الجمله الفظيعه جدا والجديده اوى بالنسبالى والحمد لله خلصت بعد نص الوقت واصيبت بحاله من الاكتئاب وقررت انى اسلم الورقه وأمشى قبل ما يجيلى أنهيار عصبى أو تتفقع مرارتى أو أموت قبل ما أشوف أمتحان الشعر
كان معكم على أسم مصر من امام مدرج 2 كليه الاداب جامعه طنطا
Sunday, May 18, 2008
Monday, April 7, 2008
أنا أتسرقت يا رجاله
مرسى أبن الزناتى أتهزم يا مينزززززززز
بالانجليزى
بس مش مرسى اللى أتهزم أنا اللى أتسرقت يا رجاله وبالعربى
أمبارح أثناء رحلتى فى المدونات روحت مدونة أخف دم وكان كاتب بوست قديم عن مواضيعى وقصايده اللى بتسرق
أنا بقى نفشت ريشى وقلت أكيد اى خاطره كتبتها متسرقتش عشان أنا أصلا عيله وبخرف زى ما أنتى عارفين
عملت سيرش عند عمنا جوجل وكتبت فى من أنا اللى كنت كتباها فى بوست عيله وبتخرف
وملقتش حاجه فرحت أوى قلت أيوه كده مهو مين هيسرق عيله وبتخرف زيى
قلت طيب أجرب تانى كتبت جمله كامله من الخاطره العبيطه اللى كنت كتباها واذا بالمفاجأه تصيبنى بالدوار واحد عبيط كاتب الخاطره كامله
كلها والله كلها ومسميها محدش يستاهلك يا قلبى
يا أخى كتك وجع فى قلبك يارب وتتقطع أيدك اللى سرقت بيها حاجاتى
مش عشان أنا بت مقطعه السمكه طرنشات وديلها حلقات ومفيش منى اتنين لاء أحنا أتفقنا من الاول أنى عيله وبخرف
لكن علشان بجد كل كلمه كتبتها سواء كانت فى بوست او غيره او حتى كتبتها فى كتاب ولا ورقة لحمه وأنا قعده بزاكر كانت طالعه من قلبى بجد
لما كتبت من أنا ده مكنش من باب الابداع لاء ده كان عشان فعلا أنا فى الفتره دى مكنتش لاقيه نفسى
من أنا دى أنا كتبتها زماااااان على منتدى هانى حسين بتاع استار أكاديمى الله اعلم بقى الامور اللى خدها خدها أمتى ومنين
حبيت بس أقولك كل واحد يحافظ على حاجاته وأى حاجه بيكتبها مينزلهاش عالنت مالها البوستات العاديه اللى أحنا بنكتبها
وعلى فكره مش لازم نكون كتاب عظماء عشان نخاف على حاجتنا كفايه نخاف عليها عشان هى بتعبر عننا وعن حاله عشناها عن كل كلمه فيها حته مننا سواء كانت حلوه او وحشه غلط أو صح
كفايه بس أن أحنا فيها وشخصيتنا مرسومه بين سطورها
وفى النهايه عايزه أقول حسبى الله ونعم الوكيل ويارب ايده تتقطع اللى ياخد حاجه مش بتاعته من أى حته وينسبها لنفسه يارب
Monday, March 31, 2008
احنا مش ملايكه ولازم نتغير
بصوا بقى أنا عايزه أتكلم معاكم فى حاجه ومش عايزه حد يفهمنى غلط مش عايزه النوايا اللى مش ولابد تطلع
وكل واحد كرامته تنقح عليه وياخد الكلام على نفسه لانه ساعتها هيبقى على راسه بطحه وبيحسس عليها
ندخل فى الموضوع على طول أنا كلامى هيبقى طالع من القلب ويارب يوصل زى ما أنا عايزه أوصله
كلنا بنشتم فى الدنيا والناس والزمن
والاخلاق اللى أنحطت وكلنا مجروحين وفى ناس كدبت علينا وأتغشينا وأتخدعنا وفى ناس طلعت نص كوم معانا وفى وفى وفى
طيب وأحنا .. أحنا أيه؟ أحنا ملايكه ؟ أحنا مبنكدبش؟ أحنا عمرنا ما عملنا موقف نص كوم مع حد ؟ عمرنا ما عرفنا حد وكلمناه بس عشان لينا طلب عنده؟ عمرنا ما كنا ناس مصلحجيه؟ عمرنا ما رمينا الورق فى الشارع ووسخنا البلد؟ عمرنا ما جبنا لب ومشينا ناكل ونتف؟ عمرنا ما أستغلينا وسطتنا ولو حتى فى طابور العيش عشان ننجز ونخلص المصلحه؟
عملنا كل ده بس أحنا خايفين نشوف نفسنا
يا أما كدبت عشان أخرج من مواقف محرجه اتحطيت فيها
يا اما روحت كلمت ناس عشان مصلحه عايزاها منهم وبعد ةكده محاولتش أرفع سماعة التليفون أسأل عليهم
يا أما مشيت أرمى ورق فى الشارع وأوسخ البلد وكتبت على البنج فى الكليه
وأستغليت وسطتى عشان أجيب نتيجه أو أوصل لدكتور أو أخلص أى مصلحه
وعرفت ناس عشان أخد منهم ورق
وعملت مع ناس مواقف مش ولا بد
أحنا مش بس بنتجرح أحنا بنعمل حاجات تجرح
بس هى لما الحاجه بتيجى فينا كرمتنا بتنقح علينا ونقول لاء أنا عمرى ما أعمل كده
ده فلان طلع اى كلام وفيه وفيه وفيه وأحنا لاء أحنا ملايكه أحنا كويسين احنا بنحب البلد أحنا مبنعملش حاجه غلط
مش عارفه ايه علاقة كل ده ببعضه بس أصلى شايفه الناس بتنتقد وتشجب وتستنكر كل حاجه ومش باصين لنفسهم مش بيدورا على غلطهم يا جماعه يلا نبص جوانا خلى عندنا اربع عيون اتنين نشوف بيهم نفسنا واتنين نشوف بيهم اللى حوالينا
نشتغل على نفسنا ونغير الحاجات الوحشه
أنا بدأت أتغير والله بتغير وبقيت ببص لنفسى قبل ما أنتقد غيرى لو فى موقف عدى أودامى معجبنيش بقيت بفتكر انا عملت ده قبل كده ولا لاء طيب لو مكان اللى عمل كده هتصرف ازاى والله العظيم وبدون اى مثاليه بقيت بجاوب على نفسى
انا مكنتش كده بس بدأت أعمل كده
تحياتى ليكم
Tuesday, March 25, 2008
يلا نساعد
Tuesday, March 11, 2008
أنا ليا وسطه فى طابور العيش
Monday, March 3, 2008
محتاجه رأيكم
Monday, February 25, 2008
قلت أجاوب التاج
مش هخبى عليكم انا فى حاله نفسيه وايضا صحيه لا تسر عدو ولا حبيب
متتخضوش بس النفسيه مش تمام فمأثره على الصحه شويه
والنبى أنا لسه صغيره ع الكلام ده بس يلا معلش الحمد لله على كل حال
بقالى يومين بعد ما الكمبيوتر بتاعى أتصلح والروح ردت فيه والحمد لله بفتح البلوج ونظرا للحاله النفسيه اللى مش ولابد
ببقى مش عارفه أكتب أيه عايزه أكتبلكم حاجه كويسه ومش عارفه أقول أيه أفتكرت تاجين جولى من فتره من احمد الصباغ ومن د\اجدع بنوته
قلت أجاوب تاج الصباغ واللى جالى من أحمد ومن د/اجدع بنوته
بسم الله الرحمن الرحيم
هل توافق على حذف خانة الديانه من البطاقه الشخصيه؟
لاء مش موافقه. ومش موافقه اصلا على انى اعترف بأيه ديانه غير الديانات السماويه التلاته ...اليهوديه والمسيحيه والاسلاميه . وأحنا دوله أسلاميه يبقى اللى يعيش هنا يطبق قوانين هنا بس بردو مش موافقه أنى أنسب أى ديانه تانيه للاسلام يعنى نحاول نميز الناس اللى بتدين بغير الديانات السماويه التلاته
ما رأيك بالمثليين؟ وهل هى حريه شخصيه؟ هل توافق على الاعتراف بهم؟ هل لديك أصدقاء منهم؟
رأى فيهم أنها حاجه تسد النفس وياريت بقى ملقيش الاعتراض على كلامى لما بقول يسدوا النفس مهو لو المثاليه حريه شخصيه والالحاد حريه شخصيه يبقى كمان راى فيهم حريه شخصيه ده اولا
ثانيا حرية شخصيه ازاى يعنى مش واخده بالى ده ربنا اهلك قوم لوط بسبب العمله دى اجى انا واقول حريه شخصيه طيب ازاى وهما بيعملوا حاجه بيتهز اليها عرش الرحمن وعلى فكره انا كنت متعاطفه معاهم الاول وفاكره انهم مرضى نفسيين لكن سالت وعرفت ان ده ملهوش علاقه لا بمرض نفسى ولا عضوى ده له علاقه بان الناس دى غاويه انحراف وبس
طبعا مش موافقه على الاعتراف بيهم ابدا ولا حتى انهم يعملوا كده فى الخفا لازم يكون فى قانون يجرم الموضوع ده يا جماعه احنا دوله اسلاميه ياما نحافظ على الاسلام ياما نستنى الهلاك بقى زى قوم لوط
لاء طبعا معنديش اصدقاء منهم
هل تعتقد بوجود اضطها للمسيحين فى مصر؟
بصوا انا هتكلم بصراحه شويه انا شايفه ان فى اضطهاد لمصر كلها للشعب كله يعنى واخوانا المسيحين مش مضطهدين ولا حاجه وانا ليا اصدقاء بحبهم جدا مسيحين ومفيش اى مشاكل ومعلش يعنى انا وانا فى المدرسه لما كان تلميذه تعمل مشكله مع زميلتها المسيحيه كانت تبقى يا داهيه دقى وتنزل للمديره تتفرد اسبوع مثلا ولا حاجه كان ممكن مدرس يتنقل من فصل لفصل بسبب انه عمل مشكله مه حد مسيحى مع انه مكنش ده ممكن يحصل لو عمل مشكله معانا احنا وش هنسى ابدا ان فى بنت زميلتنا فى الفصل مسيحيه وقفت هزات مستر العربى ومقدرش حتى يرد عليها عشان المشاكل
وده بجد كان بيحصل عندنا فى المدرسه فيبقى فين الاضطهاد بس
من هو الشخص الذى تختاره لرئاسة مصر؟
طيب وهى فين مصراساسا
اذا قمت بتأسيس حزب سياسى من هم الاشخاص الذين ستقوم بضمهم فى الحزب للمشاركه فى كحم مصر حال فوزك فى الانتخابات؟
انا ممكن اعمل حزب انسانى بس لكن فى السياسه مفهمش غير فى وجع الناس الغلابه
هل توافق على مشاركة كلا من الاخوان المسلمين والاقباط فى الحكم؟
لاء
فى رايك الشخصى ماهى افضل مدونه على بلوجر قمت بزيارتها؟
يوميات عيل مصرى
عان عرفتنى حاجات انا مكنتش اعرفها ابدا
بالاضافه لكل الناس اللى لينكاتها عندى دى
هل توافقين على الزواج من رجل مطلق؟
لاء
اذا تزوجت وانجبت ولدين وبنتين اى الاسماء تحب ان تسمى؟
لاء كفايه ولد وبنت
ولد اسميه بيجاد
وبنت اسميها فريده
هل تعتقد ان توريث الكحم فى مصر سيتم فعلا او لاء؟
لا معتقدش هيتم
وبينى وبينك الشعب مبقتش فارقه معاره اساسا
فى رايك الشخصى ما هو افضل انجاز لحكومة مبارك وما هو اسوا عمل قامت به؟
انجازات كتير والله
اسوا عمل هو اللى احنا عيشينه دلوقتى
Wednesday, February 13, 2008
عيله وبتخرف
Monday, February 11, 2008
Sunday, February 3, 2008
صوره...صوره ...صوره
Monday, January 21, 2008
تااااااااااااااج
تاج جالنا من الاخت العزيزه عليا أنا شخصيا رحاب مصطفى صاحبة مدونة
myvoice
-أسم مدونتك
فى عالم من الشجن
لماذ أخترته وماهى نيتك من وراء أختياره؟
لانى حاسه أنى عايشه فعلا فى عالم من الشجن
هل فكرت فى أغلاق مدونتك؟والسبب؟
نعم - لانى حسيت انها معملتش الاثر اللى كنت عايزاه بين المدونات
صورتك فى المدونه ورمزيتها؟
صورة طفله فى فى عنيها شوية حزن-يمكن من شوية الحزن اللى جوايا
لماذا دخلت عالم التدوين؟
دخلت عالم التدوين لشوية أسباب
أولها أنى بحب الكتابه وعندى حلم يبقالى مكان فيها
ولانى بجد نفسى أقدر أغير حاجه فى حياتنا من خلال شوية الافكار الغلبانه والكحيانه اللى بقولها فى المدونه ويارب أكون بعرف أوصل اللى عايزه أقوله
وعشان أقول كمان اللى بحس بيه لانى مش ديما بلاقى حد يسمعنى
جمله قيلت لك فى وصف مدونتك؟
مفتكرش أن حد وصفلى مدونتى أحنا عندنا ناس بتدخل فى الموضوع على طول هههههه
التعليقات بالنسبالك أهميتها؟
مهمه جدا أكتر مما تتصوروا لانها بتعرفنى تفكيرى رايح فى أى أتجاه
أحلى بوست كتبته ضع اللينك ثم أذكر لماذا؟
طبعا مش محتاجه القولكم أن كل بوستاتى حلوه وفوق الفظيعه
لاء بس بجد أحلى بوست كان نفسى اعيش براحتى عشان أنا بجد نفسى أعيش براحتى
أفضل مدونه قريتها؟
كتير مدونة أحمد الصباغ -خالوا أحمد
نوران الشاملى - بنت خيخه واى كلام
فرنسا هانم
د/أجدع بنوته
سووو- عجوز وعنده 30 سنه
رحاب مصطفى -myvoice
تراقيع نداااااااا
وكل الينكات اللى على جمب دى
حد قل أدبه فى التعليق وأيه رد فعلك؟
لحد دلوقتى لاء الحمد لله ولو حصل همسح التعليق وياريت الناس متفهمش أن معنى كده أنى مش هسمح لحد أنه يختلف معايا لاء طبعا مش كده
بس فى فرق بين الاختلاف فى الرأى وقلة الادب
أسوأ بوست وأسوأ مدون؟
مين أنا عشان أحكم على المدونات والبوستات ده انا غلباااااااااااااااااااااااااااان
هيحصل لايه لايميلك لما تموت؟
ايميلى محدش هيفتحه أكيد لكن مدونتى فى حد قريب منى اوى هوصيه يفتحها ويخليكم تدعولى وتقرولى الفاتحه أن شاء الله
أديت الباسورد لحد قبل كده؟
أه ولسه معاه وهيفضل معاه
أسمك؟
هند عمار
المشهور بيه وسط أصحابك ؟
نودا
شخصيتك نوعها أيه؟
مش عارفه ياريت حد يقدر يحللهالى وهنيالك يافاعل الخير والثواب
السفر بالنسبالك؟
سبع فوايد
وقت فراغك بتعمل فيه أيه؟
مش ديما على حسب
التليفزيون أو النت أو اخرج
المود بتاعك ؟
متقلب يعنى شويه فرحانه وشويه زعلانه بس بحاول ديما أضحك
سمعت أن الضحك بيطول العمر ههههههه
الاكله المفضله؟
كشررررررررى
صفات أخدتها من بابا؟
معرفش لانى مشوفتش بابا الله يرحمه-توفى وأنا عمرى 6 شهور
صفات أخدتها من ماما؟
الطيبه- بصدق أى حاجه بسرعه- بثق فى الناس بسرعه-حظى قليل
مجال دراستى؟
أداب أنجلش
أكتر ست حاجات بكرهم؟
الكدب- الظلم - الغدر - أنك تعرف حد بس عشان مصلحه - الخيانه- الذل
أكتر ست حاجات بحبهم ؟
الصراحه- الحب اللى بجد - الصداقه اللى بجد - كل حاجه بتطلع من القلب بجد
امرر التاج لمين؟
لكل الناس فى اللى جمب دول
Saturday, January 19, 2008
Thursday, January 17, 2008
جاءنا البيان التالى
Tuesday, January 8, 2008
لازم نكون سوا
